PDHJ no Coalition for Diversity and Action (CODIVA) Asina Akordu Servisu Hamutuk
Dili– Iha loron 27 Janeiru 2016, Provedoria dos Direitos Humanos e Justiça (PDHJ) liu husi Diresaun Direitus Umanus no Fundasaun Coalition for Diversity and Action (CODIVA) asina akordu servisu hamutuk iha Salaun Biblioteka PDHJ-Caicoli Dili. Akordu refere asina husi Diretur Diresaun Direitus Umanus Sr. Antonio M. D. C. Lopes no Manajer Projetu CODIVA Sr. Feliciano da Costa Araujo. Programa ne’e asiste husi Provedor, Dr. Silverio Pinto Baptista, Adjunta Provedora Dra. Jesuina M. F. Gomes, MPA, Diretor Geral, Diretores Nasional no Xefi Departamentus iha PDHJ, inklui konvidados husi Fundasaun CODIVA.
Diretur Direitus Umanus Sr. Antonio M. D. C. Lopes hateten katak, objetivu husi akordu ententementu ne’e atu parte rua (PDHJ & CODIVA), bele hametin relasaun servisu hamutuk hodi hasa’e koñesimentu ba membrus PNTL no Lideransa Komunitaria. Hodi nune’e membrus PNTL bele respeita no sai protektor ba Direitus Umanus inklui grupu LGBTI hodi hala’o kna’ar tuir lei. Nune’e mos Lideransa Komunitaria sira iha Koñesimentu oinsa atu fó protesaun no defende komunidades LGBTI.
Antonio hatutan tan, ho nota entendimentu refere PDHJ no CODIVA atu fasilita treinamentu ba membrus PNTL no Lideransa Komunitaria iha Munisipiu 12 no Rejiaun Administrativu Espesial Oecusse-Ambeno. Enkunatu kona-ba manual treinamentu Antonio hateten manual treinamentu mai husi grupu hakerek manual hanesan PDHJ, Centru Formasaun Formasaun Polisia Nasional Timor-Leste (CFP-PNTL) no formador sira husi Unidade Assesoria Direitus Umanus (UADU-UN) no hetan tulun husi UNDP.
Jestor Projetu Codiva Felisiano da Costa de Araujo hato’o nia laran haksolok tanba PDHJ nu’udar Instituisaun Nasional Direitus Umanus iha vontade politika di’ak hodi bele halo kooperasaun servisu ho Fundasaun CODIVA. Feliciano hatutan ho meus ida ne’e iha futuru membrus husi CODIVA bele hato’o sira nia keisax ba PDHJ bainhira hasoru autoridades publikus karik halo violasaun direitus umanus hasoru sira.
Enkuantu Provedor, Dr. Silverio Pinto Baptista iha nia intrevensaun hato’o ho asina akordu kooperasaun entre PDHJ no CODIVA nu’udar pasu importante ne’ebé PDHJ hanesan Instituisaun Nasional Direitus Umanus halo primeiraves implementa iha Rejiaun ASEAN. Provedor esplika katak oras ne’e dau-daun Sekretariu Asia Pacific Forum (APF) elabora hela mekanismu balun hodi enkoraja Instituisaun Nasional Direitus Umanus iha Nasaun sira atu bele proteje mos grupo LGBTI nia direitu hasoru diskriminasaun.
Provedor hatutan ho nota entendimentu refere bele hametin kordenasaun servisu PDHJ no CODIVA hodi fahe informasaun ba autoridades inklui mos ba komunidades hodi bele iha koñesimentu atu nune’e bele respeita sidadaun sira maka hamahon-an iha Fundasaun CODIVA nia direitus umanus.