PDHJ No Ministeru Justiça Asina Nota Entendementu Ba Kapasitasaun Guarda Prizional

Dili : loron 28 Fevereiro 2019, Provedora Dra. Jesuina Maria Ferreira Gomes no Ministro Justiça Dr. Manuel Cárceres da Costa asina nota entendementu kapasitasaun ba Guarda Prizional sira, iha edifisiu Ministeriu Justiça.
Objetivu husi asina nota entendemntu ne’e atu hametin kooperasaun entre instituisaun rua nian liu-liu iha área dezenvolve manual direitus umanus ba programa kapasitasaun direitus umanus ba guarda prizional sira husi prizaun Bekora, Gleno no Suai.
Maske nune’e liu husi diskursu Provedora hateten, objetivu nota entendementu ne’e atu hametin kooperasaun instituisaun no esforsu koletivu hodi haforsa no hametin promosaun direitus umanus ba guarda prizional sira hodi promove hasae kapasidade, abilidade, no konesementu guarda prizional sira nian iha área direitus umanus liu husi treinamentu, seminariu,workshop, sensibilizasaun no aktividade sira seluk.
“iha planu asaun annual 2019 ami iha aktividade ida atu hakerek manual direitus umanus hodi fó treinamentu ba guarda prizional sira i atu realiza aktividade ida ne’e presija nota entendementu entre instituisaun rua ne’e,”hatene, Provedora Dra. Jesuina Maria Ferreira Gomes.
Tanba ne’e nota entendementu ne’e rasik hanesan matadalan ida ne’ebé importante tebes atu regula servisu ho responsabilidade instituisaun rua nian hodi implementa programa kapasitasaun direitus umanus iha prizaun Bekora, Gleno no Suai.
Maske nune’e kapasitasaun ne’e ho intensaun atu hasae guarda prizional sira nia konesementu ba konseitu no padraun direitus umanus hodi haforsa no hametin respeitu no protesaun direitus umanus prizioneiru sira nian iha prizaun.
Iha fatin hanesan Ministru Justiça Dr. Manuel Cárceres mós afirma katak, nota entendementu ida ne’e tama iha konseitu programa VIII guvernu konstitusional nian liu-liu ba iha Ministeriu Justiça atu halo dezenvolvimentu institusional ba kapasitasaun rekursu umanu.
Ministru mós agradese tebes ba inisiativa Provedoria nian atu hametin nota de entendemntu ida ne’e ho Ministeriu Justiça hodi bele fó kapasitasaun intelektual ba guarda prizionais sira.
“Tanba guarda prizionais ema sira loron-loron tau matan ba ema sira ne’ebé naksalak kontra lei karakter hanesan ema iha mós nia limitasaun devez enkuandu sira bele tau regras konseitu hotu-hotu servidor estadu nian iha sira nia oin, nudar ser umanu devez enkuandu sira bele ultrapasa regras sira ne’e,”hateten, Minsitru Justiça Dr. Manuel Cárceres.
Tanba ida ne’e maka atravez de kapasitasaun ida ne’e sai instrumentu ida ne’ebé kapas efisiente no efikaz para guarda prizional sira loron-loron bele hetan atensaun ida atu halao knaar maibe tenke defende no respeitu dignidade ema dadur sira nian.
Serimonia ne’e hetan partisipasaun masimu husi Diretor Jeral, Xefe Gabinete, Inspetor, no diretores PDHJ inklui diretores Ministeriu Justiça nian.