• PDHJ no MP Kontinua Hametin Relasaun Servisu Ba Futuru

    Dili – Iha Relatoriu Anual 2015, husi Ministério Públiku nian, iha pájina 17 hateten katak, Ministério Públiku kontinua hametin relasaun di’ak ho Provedoria dos Direitos Humanso e Justiça (PDHJ). Felizmente hatudu katak, PDHJ haruka partisipasaun barak mai Procurador Jeral Repúblika (PJR) liu-liu ba krime sira ne’ebé komete husi membrus sira Polisia Nasional Timo Leste (PNTL) no membru sira F-FDTL ne’ebé komunidade sira direitamente aprezenta ba PDHJ.

    Infelizmente kazu balun hela to’o preskreve iha PDHJ, maibe Procurador Jeral Repúblika ho Sr. Provedor Direitos Humanos no Justisa diskuti ona para kestaun ne’e la repete tan iha tinan sira oin mai.

    Relasiona ho informasaun ne’ebé hakerek iha Relatorio Anual 2015 husi Ministério Públiku nian iha pájina 17. Provedor, Dr. Silverio Pinto Baptista, apresia teb-tebes servisu kooperasaun entre instituisaun rua ne’e ba futuru, tanba bele hato’o informasaun ba malu kona-ba kazu violasaun direitus no mal administrasaun ne’ebé ligadu ho aktus krime.

    Provedor hatutan katak, iha Estatuto PDHJ, lei númeru 7/2004 hateten katak, Instituisaun PDHJ núdar órgaun independente ida ne’ebé iha knár atu hare no buka hatan sidadaun sira nia problema hasoru entidades públiku, maske la iha kbi’it atu hakotu lia,  hato’o deit rekomendasaun ba órgaun kompetente hodi halo porsesa. Tan ne’e, espera katak liu husi kooperasaun di’ak ne’e bele mantein nafatin ba futuru hodi passa informasaun ba malu.