• pdhj no unmit kapasita profesóres hodi integra mensajen direitos umanus iha lisaun eskola

    Date: 19-09-2011

    Provedoria dos Direitor Humanos e Justiça (PDHJ)  liu husi diresaun direitos humanos departamentu promosaun no edukasaun servisu hamutuk ho UNMIT parte direitos humanos hodi kapasita profeores sira liu husi treinamentu.

    Treinamentu neé halaó iha loron 16-17 Setembru 2011 iha Viqueque. Partisipantes iha treinamentu neé mai husi profesores sira neébé hanorin iha eskola pre-primaria no eskola primaria ne’ebé hetan ona treinamentu kona-ba integra mensajen direitos umanos ba kurikulum eskola no hanorin alunu sira iha eskola oinsá uza métodu partisipativu.  Treinamentu ba profesór sira kona-ba integra mensajen direitus humanos iha lisaun ho métodu partisipativu ne’ebé profesór sira hanorin nu’udar programa kontinuasaun ne’ebé PDHJ no UNMIT hala’o tiha ona iha distritu sira hanesan Baucau no Lospalos iha fulan kotuk no sei kontinua iha distritu seluk .

    Liu husi atividade ne’e ekipa husi PDHJ no UNMIT fahe manual operasional atu integra mensajen direitos humanos iha eskola no material sira seluk ne’ebé bele ajuda profesór sira iha aula bainhira hanorin materias.

    Marina Bernadina Gaio, treinador husi PDHJ hateten katak objetivu husi treinamentu neé atu profesores sira relembra fila fali treinamentu neébé halaó tiha ona iha tinan 2008  ba profesór sira kona-ba integra mensajen direitus humanos iha lisaun ho métodu partisipativu iha aula laran ou iha prosesu aprendisajen”.

    Marina rekuiñese katak durante treinamentu, mestra sira maioria implementa duni integra mensajem direitus umanus iha lisaun ne’ebé sira hanorin no mós uza duni métodu partisipativu. Ida ne’e pasu di’ak ba PDHJ tanba treinamentu ne’ebé PDHJ ho nia parseiru UNMIT parte direitos humanos fó ba profesór sira kona-ba integra mensajen direitos humanos iha eskola la saugati. Maibé presiza iha kontinuasaun treinamentu ba profesór sira kona-ba integra mensajen direitos humanos iha aulas no apoiu material (alat peraga) atu nune’e profesór sira bele uza hodi hanorin alunu sira kona-ba direitos humanos di’ak liu iha aban bairua.

    Veronika Belo, Profesora husi Eskola Pre-Escolar Halibur Cabira-Oan hateten kontente tebes integra matéria direitos humanos iha eskola atu alunu sira bele komprende no aplika iha sosiadade nia leet. Maibé presiza treinamentu kontinuasaun atu halo kle’an liu tan “profesores sira nia kuiñesimentu kona-ba direitos humanos. Veronika fiar nia parte prontu atu integra mensajen direitos iha aulas laran bainhira sira hanorin.

    Hafoin treinamentu treinador sira fahe material sira hanesan livru kona-ba direitos humanos, manual, material bainhira halo demontrasaun no material sira seluk.

    Tuir observasaun PDHJ nian katak partispantes treinamentu antosiasmo teb-tebes hodi partisipa treinamentu. Durante treinamentu fasilitador sira sira orienta nafatin profesores sira kona-ba metodu partisipa durante hanorin lisaun eskola hanesan esplikasaun, halo drama, grupu, diskusaun, kanta, lee, jogus no aprezentasaun.

     

    Presiza Informasaun Kontaktu Lady Ximenes no Jose Tefa, Relasaun Públika PDHJ

    Ho númeru telemovel: +670 735 1412 ou bele liu husi email; ladynhaximenes@yahoo.co.id