pdhj partisipa konferensia internasional iha filipina

Date, 06-09-2010

Iha Loron  24 to’o 25 Agostu 2010, Provedor  dos Direitos Humanos e Justisa (PDHJ) Dr. Sebastião Dias Ximenes  partisipa konferensia internasional  iha Manila-Filipina ne’ebe organiza husi Asian Development Bank (ADB) servisu hamutuk ho Ombudsman Filipina.

Objetivu husi konferensia ne’e, koalia kona-ba konseitu no papel Instituisaun Ombudsman nian iha ASIA no oinsa Instituisaun Ombudsman bele hadia nia servisu, atu nune’e publiku bele hetan servisu diak liu husi Instituisaun Ombudsman tantu koalia mos konaba servisu Ombudsman nian bele desentraliza para bele fo servisu diak liu ba publiku” hatete Dr. Sebastião Dias Ximenes, Provedor”.

Alen de ne’e, iha konferensia ne’e mos koalia kona-ba independensia Instituisaun Ombudsman nian rasik tamba dala barak ema koalia katak Instituisaun OMBUDSMAN independente maibe dala ruma iha nasaun balun seidauk hala’o sira nia kna’ar ho independensia, Provedor hatutan.

Provedor fó sai katak, iha tempu ne’e mos koalia kona-ba Instituisaun Ombudsman  bele servisu hamutuk ho parseiru sira, atu nune’e bele fo servisu diak ba publiku tamba ita hotu hatene katak Instituisaun Ombudsman nia servisu mak oinsa atu promove boa governasaun diak ba publiku tomak.

Iha oportunidade ne’e mos, koalia kona-ba oinsa kapasita rekursus humanus iha Instituisaun Ombudsman nian atu bele fo servisu diak ba publiku.

Iha seremonia enseramentu, Instituisaun Ombudsman ASIA nian fo sai prinsipius ne’ebe Instituisaun Ombudsman tomak atu  kaer metin wainhira hala’o servisu.

Prinsipius importante Instituisaun Ombudsman maka mandatu tenke klaru no tenke independencia, iha transparéncia, asesibilidade, efektividade no akuntabilidade.

Iha  konferensia ne’e, Provedor  mos hato’o aplikasaun atu PDHJ Timor-Leste mos bele  sai membru associasaun Ombudsman iha ASIA tamba Timor – Leste hanesan nasaun foun. Nune’e  mos Timor-Leste foin partisipa konferensia internasional iha Instituisaun Ombudsman ba dala rua.

Partisipantes iha konferensia internasional ne’e, kompostu husi  nasaun 30 resin iha instituisaun Ombudsman iha ASIA tomak.

Informasaun liu tan bele kontaktu Lady Ximenes, Relasaun Públika PDHJ ho mobile 7304260