PDHJ Publika Rezultadu Monitorizasaun Kampaña no Eleisaun Prezidensial 2017-2022
Dili – Iha loron 3 fulan Abril tinan 2017, Provedoria dos Direitos Humanos e Justiça (PDHJ) publika rezultadu monitorizasaun ba atividade kampaña no eleisaun prezidensial ba periodu 2017 to’o 2022.
Provedor Dr. Silverio Pinto Baptista, iha konfrensia imprensa hateten katak, objetivu husi ekipa PDHJ halo monitorizasaun ba atividade kampaña no eleisaun prezidensial mak atu garante transparensia no justisa iha festa demokrátika ida neé, atu asegura katak direitu polítiku sidadaun timoroan sira implementa duni tuir padraun internasional nebeé regula iha paktu internasional kona-ba direitu sivil no polítiku, atu haré neutralidade funsionalismu públiku hodi labele involve iha kampanã polítika no mos atu detekta iregularidade no mál administrasaun kona-ba uzu sasán estadu husi parte ajente públiku sira.
Provedor esplika katak, serbisu monitorizasaun ne’ebé maka PDHJ hala’o ida ne’e la’os tanba eventu ida eleisaun ne’e, maka PDHJ halo nia monitorizaaun maibe, tanba natureza PDHJ nia serbisu iha area promosaun no protesaun direitus humanus no boa governasaun nian.
Provedor hatutan, liga ho eleisaun jeral ne’e, serbisu PDHJ nian foka liu ba iha direitu humanus, no direitus humanus ne’e fó atensaun liu ba iha direitu sivil no direitu politiku katak, durante eleisaun, antes eleisaun,tempu eleisun no depois de eleisaun.
PDHJ hanaran Instituisaun Nasional direitus humanus tenke asegura direitu sidadaun hotu-hotu nian katak, bainhira nia atu ezerse nia direitu politiku ne’e labele hetan violasun intermus de intimidasaun ba nia direitu politiku no sivil.
Iha parte seluk iha monitorizasaun ne’e mos, PDHJ tenki asegura liu-liu ba iha kandidatus sira, ekipa susesu, militantes no simpatizantes husi kandidatus ne’ebé mak partisipa iha eleisaun prezidensial ne’e, sira labele uza sala patrimoniu estadu nian, labele uza sala makina estadu nian, liu-liu envolve funsionáriu públiku ne’ebé seidauk hetan lisensa husi Funsaun Públiku durante sira nia kampaña iha tempu eleisaun no depois de eleisaun.
PDHJ mós tenki asegura ida ne’e, tanba PDHJ hanesan Instituisaun Nasional direitus humanus tenki asegura prinsipiu hirak ne’e.
“Tanba ne’e mak, parte Provdoria forma ekipa ida, ekipa ne’ebé mak ho numeru bo’ot desloka ba Munisipiu hotu-hotu no tuir dadus ne’ebé mak ami hetan depois de ida ne’e agora dadauk ami iha ekipa ida ne’ebé mak iha faze de preparasun no finaliza ami nia relatoriu ba eleisaun ne’e,” hateten Provedor.
Maske nune’e iha rezultadu husi monitorizasaun ne’e rasik haktuir katak, iha Munisipiu balun mosu indikasaun violasaun direitus umanus ne’ebé komete husi kandidatu prezidente balun durante atividade kampaña.
No iha tempu badak PDHJ sei entrega rezultadu monitorizasaun final ba Ministério no Institusaun releventes sira hodi toma responsabilidade ba aktus krimes ne’ebé mensiona iha relatoriu laran.