PDHJ Realiza Diskusaun Elaborasaun Planu Estrateziku PDHJ 2024-2028 Iha Railaco
Ermera : Loron, 25 Setembru 2023, Provedor de Direitos Humanos e Justiça, Sr.Virgílio da Silva Guterres “Lamukan” akompaña husi Provedor Adjunto ba área Boa-Governação, Sr. Rigoberto Monteiro, halo abertura ba atividade Elaborasaun Planu Estrateziku PDHJ 2024-2028 ne’ebé realiza iha loron, 25-30 Setembru 2023, iha Centro Treinamento no Ekstensaun Agrikultura, Padre Domingos Sequeira, NCBA Railaco.
Iha diskursu ba atividade ne’e Provedor hateten, diskusaun ne’e importante tebes nune’e PDHJ bele hetan enerjia foun no sei dezempeña ninia papel di’ak liu tan iha futuru hodi responde espetativa sira povu Timor nian.
Entretantu Provedor Adjunto ba área Boa Governasaun mós haktuir katak, objetivu husi atividade ne’e maka atu halo diskusaun no elaborasaun ba Planu Estrateziku PDHJ 2024-2028 deskute saida maka PDHJ nia servisu durante ne’e atu fó ba sosiedade iha Timor no kontribuisaun saida maka PDHJ sei halo para hodi apoiu servisu ne’ebé maka estadu ida ne’e halo. Entaun atu akomoda hanoin sira ne’e hotu sai ida de’it maka presija iha diskusaun ne’ebé klean no konstrutivu.
Tanba PDHJ nia servisu mak hare liu ba Boa Governasaun ho Direitus Umanus entaun tenke kombina halo didiak para lori sosiedade ida ne’e ba partisipativu liu tan iha prosesu dezenvolvimentu rekontrusaun estadu ne’e ka halo satisfasaun sosiedade.
Alende ne’e hetan mós aprejentasaun materia kona-ba Dezenvolvimentu, Progressu no Dezafius haktuir Planu Estratéjiku PDHJ 2021-2025 husi Sekretariu Ezekutivu PDHJ, Ambrosio Graciano Soares, ne’ebé partisipa mós husi Xefe Gabinete, Silvino Saldanha Pereira, Chefe Gabinete Inspesaun Auditoria Interna, Claudio do Rego, ho mós Diretores Nasional no Teritorial inklui Chefe Departementu sira PDHJ nian ho Funsionariu PDHJ.
Diskusaun ne’e rasik fasilita husi Sr. Metodio Caetano Moniz, ne’ebé sai hanesan fasilitador ba iha atividade diskusaun no elaborasaun ba Planu Estrateziku PDHJ 2024-2028.