• pdhj sai membru permanente asian ombudsman association (aoa)

    Date : 14-12-2011

    Dr. Sebastião Dias Ximenes, Provedor hateten Timor Leste liu husi instituisaun nasional PDHJ sente orgullu, tamba iha tinan ne’e, liu husi General Assembly Meeting, iha konferensia ba dala 12 Asian Ombudsman Association (AOA) iha Japão aprova no simu PDHJ sai membru permanente ba AOA nian, inklui Ombudsman husi Nasaun seluk.

    Haú hanoin neé urgullu boot ba ita nia nasaun tanba Asembleia Geral AOA bele aprova PDHJ sai membru wainhira PDHJ hato’o pedidu no proposta hodi sai membru no ikus mai realiza duni iha tinan ne’e’hatutan Provedor.

    PDHJ Timor Leste hetan konvite husi asosiasaun refere iha tinan ne’e hodi ba partisipa no sai nudar observadór ba konferénsia AOA ba dala sanulu resin rua (12) iha Tokyo-Japaun hahu husi loron 5-8 Dezembru 2011. Iha konferensia tinan 2010 iha Manila-Filipina, PDHJ hatoó pedido atu sai membru no tinan neé foin aprova.

    Provedor hatutan tan katak, Instituisaun Provedoria Direitus Humanus no Justisa Timor Leste kria mos kooperasaun ho instituisaun Ombudsman sira ne’ebé iha nasaun Rejiaun Azia nian ne’ebé halibur-an iha Asian Ombudsman Association (AOA).

    Konferénsia anual ba dala sanulu resin rua (12) ne’e, partisipantes mai husi nasaun membru AOA sira iha Azia hamutuk 30. Hola parte mos iha enkontru ne’e Prezidenti International Ombudsman Institution (IOI) husi Nova Zelandia, inklui Timor Leste ne’ebé sai nudar observadór ba konferénsia AOA iha Japaun. Husi parte Eropa nian reprezentante husi Ombudsman Hungria.

    .

    Partisipante husi PDHJ iha konferénsia AOA ne’e maka hanesan, Sr. Sebastião Dias Ximenes, Provedór (Xefe Ekipa), Sr. Rui Pereira dos Santos, Adjuntu Provedór ba area Boa-Governasaun (BG), Ambrósio Graciano Soares, funsionariu PDHJ husi Diresaun Boa-Governasaun.

    Objetivu prinsipál husi konferénsia AOA ne’e, atu kria kooperasaun ne’ebé metin entre instituisaun ombudsman iha rejiaun Ázia no troka ideias no esperiénsia servisu husi nasaun sira seluk, panelista no matenek na’in sira hodi sai sasukat ba misaun instituisaun ombudsman iha nasaun ida-idak nian.

     Tuir PDHJ nia observasaun durante konferénsia AOA hala’o, hatudu katak, iha esperiénsia lubuk bo’ot ida ne’ebé hato’o husi ombudsman nasaun seluk no matenek na’in sira ne’ebé presiza tau ba konsiderasaun. PDHJ sai ona membru ba AOA, ne’e duni PDHJ tenki prepara a’an ba konferénsia sira tuir mai no kria relasaun metin liu tan ho ombudsman sira iha rejiaun Azia  no rejiaun seluk.

     

    Presiza Informasaun Kontaktu Lady Ximenes, TP Relasaun Públika PDHJ Telemovel 7304260 ou Jóse Tefa 735 1412 ou 3331071