• PDHJ Sensibiliza Direitus Umanus no Governasaun Di’ak ba Estudante Secundaria Geral Liquiça

    Liquiça: Loron, 21 Março 2024, Provedor de Direitos Umanus e Justisa liu husi diresaun promosaun sensibiliza kna’ar sira PDHJ nian liga ho direitus umanus no governasaun di’ak ba estudante nain 40, husi Escola Secundaria Geral Liquiça.

    Liu husi aprejentasaun materia Sekretariu Ezekutivu PDHJ, Sr. Ambrosio Graciano Soares akresenta katak, atu aumenta koñesementu estudante sira nian kona-ba papel Provedor de Direitos Humanos e Justiça nian hodi proteje direitus umanus no promove governasaun di’ak iha rai doben Timor-Leste, liu-liu ba estudante sira.

    Tanba PDHJ nudár instituisaun nasionál direitus umanus Timor-Leste nian, orgaun independente ne’eb’e hari’i atu proteje direitus umanus no promove governasaun di’ak sei alkansa nia objetivu liu husi, edukasaun, promove kooperasaun, rezolusaun, no investigasaun, peskiza no monitorizasaun.

    Ne’eduni sensibilizasaun ida ne’e hanesan parte ida husi edukasaun ne’ebé maka atu konsiensializa públiku liu husi promosaun hodi respeita ba direitus umanus, estadu de direitu no governasaun di’ak. Tanba estudante sira sai mós hanesan alvu importante ida husi PDHJ.

    Alende materia husi Sekretariu Ezekutivu iha mós materia husi Formandu PDHJ ne’ebé maka lori fahe mós materia kona-ba direitus umanus no governasaun di’ak ba estudante sira.

    Iha fatin hanesan, Diretor Interinu Escola Secundaria Geral Liquiça, mós apela ba nia estudante sira atu partisipa ho ativu iha sensibilizasaun ne’e tanba materia sira ne’e importante tebes hodi aumenta kunesementu estudante sira nian kona-ba prinsipiu sira direitus umanus nian inklui papel husi PDHJ nian rasik.

    Nia hatutan, maske antes ne’e PDHJ ba halo ona sensibilizasaun dahuluk iha eskola refere maibe, sira nia parte nafatin agradese no kontenti ho prejensa PDHJ nian ne’ebé maka hakarak atu fahe nafatin informasaun relasiona ho direitus umanus no governasaun di’ak ba sira nia estudante sira.

    Atividade sensibilizasaun ne’e rasik realiza iha Escola Secundaria Geral Liquiça, ho partisipasaun masimu husi estudantes sira.