Date ; 22-06-2012
Dili– Ekipa monitor PDHJ iha Distritu Ermera simu lamentasaun husi komunidade sira katak komunidade sira iha Distritu refere barak maka la hatene kona-ba mekanismu hatoó kesar kuandu mosu ofensas eleitoral. Padre Paroquia Distrito Ermera, Lourensu de Deus hateten ba ekipa monitorizasaun Provedoria dos Direitos Humanos e Justiça (PDHJ) katak, servisu husi Comisaun Nasional da Eleisaun (CNE) no Sekretariadu Tekniku Administrasaun Eleitoral (STAE) ladun servisu maximu to’o iha baze.
“Tanba realidade hatudu iha Distrito ne’e katak, parte husi instituisaun refere hato’o deit informasaun kona-ba edukasaun votante fo tuir deit liu husi Xefi do Suco maibe la hasoru diretamente ho populasaun atu esplika prosesu eleisaun nia lalaok no mekanismu hato’o keixa kona-ba ofensa eleitoral inklui nia (Padre) rasik mos la hatene,” hateten Padre Lourensu de Deus ba ekipa monitorizasaun PDHJ iha ninia rezidensia iha loron 16/06.
Kona-ba aktividade kampaña iha Distrito Ermera, Padre Lorensu esplika katak, iha lideransa partido balun bainhira hala’o aktividade kampaña ho modelu tama uma ba uma halo ameasa ba komunidade sira halo promesa ba komunidade sira ho buat oin-oin. Nuneé mos iha partidu balun ameasa ba militantes sira katak sira tenke manan iha 2012 se lae, tasi sei sae no ema sei halai namkari fila fali hanesan iha tinan 2006, Padre informa ba ekipa monitor PDHJ.
Iha Distrito Lautem, ekipa monitor PDHJ simu informasaun husi komunidade sira katak durante ne’e membru CNE nian balun mak ba fahe ona informasaun kona-ba prosesu eleitoral no prosesu hato’o kesar nian iha Sub Distritu balun, maibe Sub Distritu balun seidauk tanba membru sira CNE iha Distritu Lautem limitadu no transporte mos limitadu, tan ne’e difikulta sira nia servisu hodi ba to’o iha Sucos no Aldeias hotu.
Monitor PDHJ iha Distritu Manufahi relata katak, iha komunidade balun rekoñese katak sira hetan ona informasaun no edukasaun sivika maibe kona-ba eleitoral sira la hetan informasaun kona-ba mekanismu kesar nian, nune oinsa komunidade sira bele aprezenta kesar kona-ba ofensa eleitoral, tanba sira la hatene kesar ne’e atu hato’o ba ne’ebe. Iha mos komunidade balu mak la asesu ba CNE tanba sira la hatene se mak membru husi CNE ninian.
Nuneé iha Distrito Oe-cusse, ekipa monitor PDHJ nota katak, oras ne’e dadaun parte CNE halao daudun ona edukasaun votantes tuir Suco ida-ida kona-ba oinsa vota iha dia 07 de Jullu ne’e maibe ladun hetan partisipasaun husi komunidades sira.
Iha Distritu Viqueque ekipa monitor PDHJ nian relata katak, kampaña Partidu UDT nian neébé halaó iha loron 14 Juñu 2012 hetan partisipasaun husi Xefe Aldeia Uha-Kae Suco Uma-ain Kraik. Partisipa iha kampana ne’e hanesan Jurkam/ekipa susesu partidu UDT iha area refere. Observador PDHJ hare kona-ba informasaun refere Xefe Aldeia ne’e viola ona regras eleisaun parlamentar nian, depois Xefe Aldeia ne’e mos uza atributu partidu nian iha tempu kampana. No Xefe Aldeia rasik mos husu ba nia povu iha area Uha-kae atu vota ba partidu UDT.
Kona-ba partidu balun maka halo ameasas ba komunidade sira, Provedor de Direitus Humanus no Justisa (PDHJ) Dr. Sebastião Dias Ximenes hateten katak kestaun neé krime eleitoral nune PDHJ sei rekomenda ba parte kompetentes atu bele tau matan ba kestaun refere.
.
Presiza Informasaun Kontaktu Lady Ximenes, TP Relasaun Públika PDHJ Telemovel 7304260 ou Jóse Tefa 735 1412 ou 3331071