KOMUNIKADU IMPRENSA
Dili, Timor-Leste – 19 Novembru 2024 – Fórum Nasionál Instituisaun Direitus Umanus Sudeste Aziátiku (SEANF) konklui nia Konferénsia Anuál ba dala 21 ohin iha Dili, Timor-Leste, ho kompromisu renovadu atu avansa direitus umanus iha rejiaun tomak. Konferénsia ne’ebé hala’o iha loron 18-19 fulan-novembru tinan 2024, halibur hamutuk Instituisaun Nasionál sira Direitus Umanus nian (NHRIs) sira hosi Sudeste Aziátiku, no mós parseiru internasionál sira no parte interesada prinsipál sira, hodi diskute kestaun krítiku sira direitus umanus nian ne’ebé rejiaun ne’e hasoru.
Tinan ida ne’e, Peovedoria Direitus Umanus no Justisa (PDHJ) Timor-Leste hala’o kna’ar nu’udar Prezidente SEANF nian, no iha nia lideransa, Fórum ne’e organiza enkontru grupu traballu tékniku rua no konferénsia anuál. Esforsu hirak ne’e subliña PDHJ Timor-Leste nia papél ne’ebé buras iha advokasia rejionál ba direitus umanus. Prezidénsia sei entrega ba Komnas HAM, Indonézia, iha tinan 2025, ho planu sira ba kolaborasaun kontinua iha asuntu sira hanesan prevensaun tortura, laiha estadu, direitu migrante sira, no direitu dijitál sira.
Iha konferénsia, partisipante sira diskute prioridade xave sira ne’ebé trasa iha SEANF nia Planu Estratéjiku (2022–2026), inklui asegura direitus umanus iha kontestu pandemia COVID-19, avansa negósiu no direitus umanus, no prevene tortura. Rezultadu notável sira hosi konferénsia inklui atualizasaun sira kona-ba SEANF nia inisiativa sira hodi rezolve dezafiu sira direitus umanus transfronteirisu nian, partikularmente laiha estadu/nasionalidade iha Sudeste Aziátiku, no Fórum nia kompromisu kontinua hodi rezolve direitu sira hosi grupu marjinalizadu sira, hanesan ema katuas-ferik sira no komunidade sira ne’ebé laiha nasionalidade.
Rezultadu Xave sira no Kompromisu sira iha Futuru
Konferénsia Anuál ba dala 21 destaka progresu importante sira kona-ba SEANF nia prioridade xave haat:
- Direitus Umanus no COVID-19: SEANF reafirma ninia kompromisu atu garante katak direitus umanus sai nafatin sentrál ba resposta nasionál sira ba krize COVID-19, partikularmente ba komunidade marjinalizadu sira.
- Direitus Umanus iha Negósiu: SEANF kontinua nia serbisu kona-ba avansa direitus umanus iha negósiu, ho foku ida atu asegura responsabilizasaun no responsabilidade korporativu iha Sudeste Aziátiku.
- Prevensaun Tortura: Membru SEANF hafoun fali sira-nia kompromisu atu prevene tortura no tratamentu ka kastigu kruél, dezumanu, ka degradante sira seluk, ho esforsu kontínuu atu hametin mekanizmu monitorizasaun.
- Hametin SEANF nia Kapasidade Institusionál: Fórum kontinua diskusaun sira kona-ba estrutura futuru Sekretariadu SEANF nian no durasaun mandatu prezidénsia nian, ho akordu ida atu tuir modelu rotasaun prezidénsia nian no esplora liután Sekretariadu permanente ida.
Adisionalmente, membru SEANF sira afirma sira-nia apoiu ba inisiativa rejionál sira hanesan kolaborasaun ho ASEAN kona-ba direitu traballadór migrante sira no direitu vítima sira tráfiku umanu nian. Fórum ne’e mós rekoñese importánsia ne’ebé buras ba direitu dijitál no siberseguransa, no kompromete atu envolve iha diskusaun sira iha eventu RightsCon ne’ebé sei mai iha 2025.
Hasoru Komunidade sira ne’ebé laiha Estadu/Nasionalidade no Marjinalizadu sira
Asuntu xave ida ne’ebé diskute maka dezafiu ne’ebé la’o hela kona-ba laiha estadu iha Sudeste Aziátiku, partikularmente iha kontestu komunidade sira ne’ebé hela iha área fronteira sira. Membru SEANF espresa sira-nia apoiu ba Memorandu Entendimentu (MOU) entre Komisaun Direitus Umanus Filipina (CHRP), SUHAKAM husi Malázia, no Komnas HAM husi Indonézia, ne’ebé buka atu rezolve preokupasaun direitus umanus husi ema sira ne’ebé laiha estadu, liuliu Komunidade Filipina no Indonézia iha Sabah, Malázia. MOU, ne’ebé renova iha 2023, sei vigora nafatin to’o 2028, no membru sira SEANF nian promete atu kontinua sira nia advokasia ba protesaun ema sira ne’ebé laiha estadu no refujiadu sira iha rejiaun.
Haree ba oin
PDHJ nu’udar prezidénsia Timor-Leste nian ba SEANF konklui iha 2024, Fórum ne’e hein ba kontinuasaun lideransa Komnas HAM, Indonézia, ne’ebé sei asume prezidénsia iha 2025. Membru SEANF sira reafirma sira-nia kompromisu atu aprofunda kolaborasaun, hametin parseria ho órgaun internasionál sira hanesan UNHRC no APF, no avansa direitus umanus ba ema hotu iha Sudeste Áziatiku.
Apelu ba Asaun
SEANF husu ba nia membru sira hotu atu kontinua envolve iha diálogu, fahe prátika di’ak liu, no partisipa iha inisiativa konjunta sira hodi promove no proteje direitus umanus iha rejiaun tomak. Fórum ne’e enkoraja governu sira, sosiedade sivíl, no parte interesada sira seluk atu kolabora hodi garante katak direitus umanus sai nafatin hanesan foku sentrál ba polítika nasionál no rejionál sira.
Atu taka, membru SEANF sira reafirma sira-nia dedikasaun ba prinsípiu sira ne’ebé konsagra iha Deklarasaun Universál Direitus Umanus no Prinsípiu Paris nian, hodi promete atu kontinua sira-nia esforsu koletivu hodi garante realizasaun direitus umanus ba ema hotu iha Sudeste Aziátiku.
Adota iha: 19 Novembru 2024
Ba no hodi naran Fórum Nasionál Instituisaun Direitus Umanus Sudeste Aziátiku (SEANF)
Asina husi:
Dr. Atnike Nova Sigiro, Chairperson, Komisaun Nasionál Direitus Umanus Indonézia (Komnas HAM)
Dato Seri Mohd Hishamudin Yunus, Chairperson, Suruhanjaya Hak Asasi Manusia Malaysia (SUHAKAM)
Atty. Richard P. Palpal-latoc, Chairperson, Komisaun ba Direitus Umanus Filipina nian (CHRP)
Sra. Preeda Kongpaen, Komisária, Komisaun Nasionál Direitus Umanus Tailándia nian (NHRCT)
Sr. Paw Lwin Sein, Chairperson, Komisaun Nasionál Direitus Umanus Myanmar (MNHRC)
Sr. Virgílio da Silva Guterres “Lamukan”, Provedor de Direitos Humanos e Justiça (PDHJ)
This post is also available in: English