PDHJ – UE Lansa Manual Telenovela Laloran Justisa

Dili : iha loron 26 Janeiru 2018, Provedor Provedoria Direitus Humanus no Justisa (PDHJ) Dr. Silvério Pinto Baptista hamutuk ho Uniaun Europeia (UE) ne’ebé reprezentan husi Sra. Joana halo lansamentu ba manual filme telenovela laloron justisa iha salaun hotel JL-Villa Fatuhada-Dili.

Iha abertura, Provedor hateten katak, telenovela ida neé hanesan primeira telenovela ne’ebé produs iha Timor-Leste husi ema timor oan sira rasik. telenovela ne’e foka ka deskreve liu-liu kona-ba valores fundamentais no prinsipiu sira direitus umanus no lei nian núdar meius edutaiment atu eduka no diverte ou haksolok ba ema timor oan sira.

Telenovela ne’e ho seri ou episodiu 20 kona-ba, igualdade generu, diskriminasaun, knár policia no judisiariu sira no prosedimentu legal, liberdade ba informasaun, liberdade imprensa, direitu ba trabalador, direitu ba edukasaun, direitu ba ema difisiensia, violensia domestika, disportu, domin no forma familia.

Objetivu atu aumenta efektividade no haforsa inpaktus husi knár PDHJ nian waihira hala’o nia mandatu konstitusional no atu atu eduka no habelar koñesimentu husi hare nain ka telespetadores sira nian, liu-liu kona-ba asuntu sira direitus umanus no lei nian.

Telenovela neé konforma tebes ho tarefa fundamental PDHJ nian atu habelar informasaun sira relativa ho direitus umanus iha Timor-Leste, hanesan hakerek iha Deklarasaun Nasoins Unidas nian kona-ba Edukasaun no Formasaun ba direitus umanus.

Provedor esplika ho prezensa telenovela laloran justisa, iha titulu hirak ne’e refleta tebes kondisaun ka realidade sosiedade timoroan ne’ebé mak hamrok ba direitu no justisa .

Telenovela ne’e mos hanesan instrumentu hodi habelar servisu PDHJ nian iha área protesaun no promosaun direitus umanus nomos sai hanesan instrumentu hodi halo advokasia ba asuntu direitus humanus ne’ebé mak Estadu Timor-Leste seidauk implementa.

Provedoria Direitus Umanus no Justisa sente orgullu tamba bele uza filme ne’e hanesan instrumentu hodi divulga informasaun kona-ba direitu no justisa tanba saida mak foka liu ba iha area rural, tamba komunidade timoroan barak mak menus asesu informasaun liu-husi jornal ka televisaun nomos iha area rural kapasidade ema timor oan iha asesu ba media jornal ka audiovisual ne’e sei menus.

Realizasaun Telenovela neé tanba servisu hamutuk entre PDHJ, AJAR, RTTL no Dili Film Works ( neébe ho nia autor sira konpostu husi entidades oi-oin husi ema timor oan sira), no programa telenovela ne’e finansiadu husi Uniaun Europeia neébe hanesan parte ida husi Planu Asaun UE nian kona-ba Direitus Umanus no Demokrasia hodi kontribui ba hametin kapasidade Instituisaun Nasional Direitus Umanus sira.