PDHJ- UNTL Asina MoU Kapasita Lian ba Funsionáriu

Dili : Iha loron 30 Abril 2019, Provedoria dos Direitos Humanos e Justiça (PDHJ) ho Universidade Nasional Timor-Leste (UNTL) asina nota entendimentu (MoU) kona-ba oinsa atu halo kooperasaun servisu hamutuk hodi kapasita funsionáriu PDHJ nian ba lian ofisial.

Provedora, Jesuina Maria Ferreira Gomes, MPA hateten katak, objetivu husi asina akordu kooperasaun entre PDHJ ho UNTL atu halo kooperasaun servisu hamutuk hodi kapasita funsionáriu PDHJ nian ba lian ofisial mak hanesan lian Portuges, Tetun no Inglés.

Provedora hatutan tan katak, asina momerandum entre instituisaun rua ne’e, atu estabelese kooperasaun no kolaborasaun iha área formasaun lian ba funsionárius PDHJ nian, tanba sidadaun sira ne’ebé haknar a’an núdar funsionáriu públiku iha obrigasaun hatene lian ofisial rua mak hanesan lian Tetun no Portuges inklui mos lian Inglés.

Provedora hatutan, tanba sa PDHJ iha hanoin atu kapasita nia funsionáriu sira konaba lian, tanba hanesan ema hotu hatene katak, PDHJ nia servisu oinsa atu haré no halo peskiza no advokásia hanesan seminar iha área direitus umanus no governasaun di’ak.

Tuir Provedora ne’e katak, kursu lian portuges, inglés no tetun ne’e hanesan diseminasaun ba material direitus umanus no governasaun di’ak, oinsa atu haré ba asuntu korrupsaun sira. Tanba ne’e hamutuk halo peskiza ka estudu hamutk inklui publikasaun no desiminasaun rezultadu peskiza.

“Formasaun ne’e ita kontinua hare liu ba estudu lisensiatura no mestradu UNTL iha área demokrasia no direitus umanus, direitu jestaun no área relevantes sira no advokásia ba entidades publika no privadu sira relasiona ho direitus umanus no governasau di’ak”, katak Provedora.

Ikus liu núdar, Provedora hato’o katak ida ne’e hanesan esperansa ida ba PDHJ no UNTL oinsa hamutuk atu halo kooperasaun no kontribuisaun hamutuk fó apoiu ba malu iha parte hotu.

Nune’e, PDHJ mos bele halo nia knár diak liu tan hodi promove no proteje direitus umanus no promove governasaun di’ak iha nasaun Timor-Leste.

Iha fatin hanesan, Reitor UNTL, Prof. Dr. Francisco Miguel Martins, M. Hum, agradese tanba hetan fiar husi Provedora kona-ba servisu ne’ebé atribui ona atu kapasita funsionárius Provedoria nian iha lingua no área sira seluk.

No ida ne’e, sai hanesan knár ne’ebé UNTL simu hanesan responsabilidade moral ne’ebé atu hala’o diak no lolos.

Reitor ne’e, hateten hodi komprimetiva katak UNTL sei kaer prinsipiu avansa ne’ebé mai ho kualidade iha formasaun ne’e, tanba UNTL iha kedan sentru formasaun rua, hanesan sentru ida ba lingua Tetun no ida ba Portugés inklui mós lian Inglés.

Tanba ne’e, UNTL iha formasaun ne’e, sei foka liu iha sentru lian Tetun no Portugés, tanba UNTL sira promove oinsa atu garante no eleva lian ofisial ba nasaun ne’e rasik konsagra iha Konstitusi.

Ita Timor-Leste, ita sidadaun. Tenke iha responsabilidade moral, iha etika politiku hodi tane as governasaun di’ak, liu husi lian ofisial rua ne’e hotu. UNTL núdar instiuisaun publika estadu nian, iha responsabilidade moral oinsa atu promove no dezenvolve rekursu formasaun ne’ebé tuir estadu nia hakarak.