Hafoin semana ida hahu husi loron, 16-20 Outubro 2023 ekipa formador ne’ebé kompostu husi PDHJ, UADU no Centro Formasaun Polisia (CFP) fasilita formasaun kona-ba kna’ar PNTL liga ho Direitus Umanus ba Comandante Eskuadra PNTL Munisipiu Ermera ho objetivu atu hasa’e profisionalidade servisu Polisia Nasional Timor-Leste (PNTL) Munisipiu Ermera hodi labele komete violasaun direitus umanus iha knaar loron-loron nian.
Iha enseramentu ba atividade ne’e Provedor Adjunto Boa-Governaçao, Sr. Rigoberto Monteiro akresenta katak, formasaun ba direitus humanos inklui materia ne’ebé fasilita ba partisipante sira ne’e atu hasa’e kapasidade no profisionalidade servisu PNTL sira nian iha terenu tanba sira maka servisu besik liu ho komunidade sira.
Ne’eduni apela ba partisipante sira atu iha future bele aplika Pratika ba materia direitos humanos sira ne’ebé maka hetan husi formador sira hodi ejekuta ordem sein iha violasaun ba direitu sidadaun sira nian.
Iha fatin hanesan Comandante Policia Municipio Ermera, Superintendente Ludgerio Lay, mós agradese no apresia tebes ho instituisaun PDHJ, UADU no Centro Formasaun Polisia (CFP) ne’eb’e maka durante semana ida fasilita ona formasaun direitos humanos ba iha nia Comandante Eskuadra sira no husu mós ba Comandante Eskuadra sira atu fahe mós ba membru sira nune’e sira mós bele iha kuinesementu kona-ba saida maka direitos humanos no nia aplikasaun sira.
Alende ne’e nia mós husu atu formasaun ne’e labele para de’it iha ne’e maibe tenke fasilita mós ba sira ne’ebé maka seidauk hetan oportunidade ba tuir.
Entretantu formasaun ne’e rasik realiza iha Sala enkontru Comando PNTL Gleno Munisipiu Ermera, hahu husi loron, 16 Outubro 2023, no ensera husi Provedor Adjunto Boa-Governação, Sr. Rigoberto Monteiro ho Comandante Policia Municipio Ermera, Superintendente Ludgerio Lay.