Prezidente Lu Olo Apresia Ho Serbisu PDHJ Liga Ba Promosaun Direitus Umanus

Dili : Iha loron 20 Novembru 2017, Prezidente da Republika Dr. Francisco Guterres “Lu Olo”, liu husi nia diskursu iha seminariu nasional kona-ba Knár F-FDTL no Direitus Umanus ne’ebé realiza iha salaun enkontru Ministeriu Defeza Fatuhada Dili hateten, nia parte apresia ho kooperasaun serbisu ne’ebé mak durante ne’e realiza husi, PDHJ, Komando F-FDTL, Ministeriu Defeza, Kaza Militar Prezidénsia Repúblika no ONU Direitus Umanus iha Timor-Leste hodi fasilita manual treinamentu ba ofisial F-FDTL sira liga ho knaár F-FDTL no Direitus Umanus.

“Semináriu ida ne’e merese ita nia hahi’i. Ha’u fó parabéns ba organizadór sira – inklui Provedoria Direitus Umanus no Justisa, Komandu F-FDTL, Ministériu Defeza no Seguransa no Kaza Militar Prezidénsia Repúblika -tanba hatudu sira-nia kapasidade servisu no hala’o servisu nu’ udar ekipa no nune’e, konsege organiza duni seminariu Nasional Kona-ba Knaar F-FDTL No Direitus Umanus, ida ne’e,”hateten, Prezidente da Republika Franscisco Guterres Lu Olo iha nia diskursu.

Nia hatutan, susesu misaun forsas defeza nian depende ba dixiplina – no mós oinsá haklean militár sira nia preparasaun profisionál no téknika hodi respeitu ba Direitus Umanus hosi militár sira sei refere ba beibeik nu’ udar kestaun dixiplina – no profisionalizmu militár sira-nian.

Hatuir Manuál prosedimentu FALINTIL-FDTL nian, iha aspetu hotu-hotu, inklui devér militár sira-nian atu defende no respeita Direitus Umanus. Ida ne’e sai ezijénsia ida hosi dixiplina militár.

Tanba ne’e, inisiativa hodi hala’o Semináriu ida-ne’e importante tebetebes atu hametin doutrina FALINTIL-FDTL nian no bolu atensaun ba jerasaun militár oioin atu haree ba Forsas Defeza ninia responsabilidade ba ita-nia povu no ita-nia sosiedade.

Iha fatin hanesan Provedor Silverio Pinto Baptista mós agradese ho prezensa Prezidente da Repúblika nian ne’ebé, konsege halo abertura ba iha seminariu nasional Direitus Umanus kona-ba kna’ar F-FDTL No Direitus Umanus.

Tanba depois de seminariu ne’e ekipa tekniku sira ne’ebé mak estabelese ona sei hahu utilize manual ida ne’e hodi halo treinamentu ba forsa defeza.

Entertantu intensaun husi treinamentu ida ne’e, oinsa entidades estadu hotu-hotu atu bele iha koñesimentu ba asuntu direitus umanus tanba, koalia kona ba direitus umanus iha Timor leste no tuir kriteriu no karakteristiku direitus umanus iha situasaun saida de’it entidades publiku hotu-hotu iha dever tomak atu bele kumpri.

“Tanba ida ne’e mak sai ona kumprimisiu ba estadu TL tanba ne’e mak iha biban ida ne’e ita realija seminariu ida ne’e no espera iha seminariu ida ne’e bele loke ita nia Vizaun ita nia konesimentu,”dehan Provedor.

Provedor hatutan, iha biban ida ne’e mos ita konvida ita nia peritu balun nebe mak mai husi nasaun vizinu Nova Zelandia sei partilla mós sira nia esperiensia atu nune’e ita hamutuk kolabora no kopera hamutuk hodi dezenvolve ita nia forsa defeza ba iha future.