Dili– Iha loron 5 Marsu 2015, Profesional Fellowship husi Estadus Unidus Amerika (USA) nain rua, Sr. Mike Davis nu’udar Jestor Administrador iha Sidade Middleton ho Sr. Bradford Thomas nu’udar Diretór fornesimentu Utilizasaun ba Publiku iha Sidade Leonir, Estadus Unidus Amérika, mai vizita Instituisaun PDHJ hodi fahe esperiénsia servisu iha área governasaun di’ak nian.
Provedora Adjunta ba área Governasaun Di’ak, Dra. Jesuina Maria Ferreira Gomes hateten katak, objetivu husi vizita ne’e, atu fahe esperiénsia servisu no bele hasa’e koñesimentu entre funsionáriu PDHJ nian no mós bainaka sira husi Estadus Unidus Amerika iha área governasaun bele hare’e konaba transparánsia ho akontabilidade iha nasaun Timor-Leste kompara ho Estadus Unidus Amerika, no mos bele aprende kona-ba kultura husi nasaun ida-idak nian.
Adjunta mos dehan katak, durante visita iha PDHJ Ofisial sira husi Departamentu Promosaun no Edukasaun, Diresaun Governasaun Di’ak fahe mós esperiénsia ba profesional fellowship sira kona-ba servisu PDHJ nian hanesan papel PDHJ, issu governasaun di’ak iha Timor-Leste no kategoria violasaun governasaun di’ak.
Programa ne’e, kada tinan ONG ICMA (The Internationa City/County management Association) oferese oportunidade ba nasaun tolu mak hanesan Timor-Leste, Indonézia no Estadus Unidus Amerika rasik. Partisipante husi Timor-Leste no Indonézia partisipa programa interkambiu iha Estadus Unidus Amerika no partisipante husi Nasaun Estadus Unidus Amérika, mai partisipa programa interkambiu iha Timor-Leste no Indonézia.
Liu husi programa interkambiu ne’e partisipante sira sei aprende kona-ba “Prosesu Lejislativu no prátika Governasaun nian (Transparênsia no Akontabilidade)”. Partisipante sira aprende liu kona-ba abilidade ne’ebé foka liu ba iha servisu governu lokál nian, inklui papel no responsabilidade atu promove transparánsia no akontabilidade no mós promove komunikasaun diak entre lideransa iha nivél governu, estadu no ONG.