Provedor Entrega Relatoriu Inisiu Monitorizasaun Ba MS
Dili- Iha loron 20 Setembru 2016, Provedor Dr. Silverio Pinto Baptista, akompañia husi Diretor Asistensia Públika, Silvino Saldanha Pereira, Oficial Peskizadora, Dircia M. F. Xavier no Oficial Jurídico no Administrativo, Valerio Magno Ximenes, entrega relatoriu inisiu monitorizasaun 2 ba Ministra Saúde, Sra. Maria do Céu S. Pina da Costa, iha salaun enkontru Ministério da Saúde Palacio da Cinzas Caicoli-Dili.
Relatoriu inisiu monitorizasaun 2 ne’e mak kona-ba “Sistema Distribuisaun Ai-moruk Iha Timor-Leste” no mos relatoriu kona-ba “Asesu Ba Informasaun no Asistensia Saúde Reproduktiva Iha Programa Serviços Integrados Ministério Saúde Comunitária (SISCa).
Provedor Dr. Silverio Pinto Baptista hateten katak, relatoriu ne’ebé entrega ba Ministra laos relatoriu final maibe ne’e sei hanesan relatoriu inisiu ba isu ne’ebé ekipa monitorizasaun sira hetan iha fatin monitorizasaun. Ohin (iha loron 20 Setembru) entrega relatoriu ne’e, depois Ministra ho nia ekipa tomak sei fó resposta fali ba Provedoria kona-ba rekomendasaun sira iha relatoriu ne’e nia laran, depois mak Provedoria hasai fali relatoriu ikus kona-ba isu ne’ebé temi iha leten.
Provedor relata ba Ministra katak, atividade monitorizasaun kona-ba “Asesu Ba Informasaun no Asistensia Saúde Reproduktiva Iha Programa SISCa, hala’o deit iha Postu Administrativu Lolotoe, Balibo Munisipiu Bobonaro no Postu Administrativu Fatululik, Fatumea Munisipiu Covalima 2.
Razaun hili fatin hirak ne’e sai hanesan alvu monitorizasaun, tanba fatin refere ho distansia dook husi kapital Dili no mos besik iha linha fronteira entre nasaun Timor-Leste no Indonesia, fatin ne’e mos sai hanesan fatin ba grupu feto ho asidente ba mortalidade ne’ebé a’as, no ikus liu mak feto iha Munisipiu rua ne’e iha risku liu ba asesu asisténsia saúde no susar mos ba asesu informasaun kona-ba programa SISCa.
“Ita liga ba implementasaun tratadus internasional ne’ebé Timor-Leste ratifika ona, entaun estadu nia dever tenke promove, proteje no nakonu sidadaun sira nia direitus umanus hodi asesu ba programa governu nian iha territoriu laran”, dehan Provedor.
Aliende monitorizasaun ba programa SISCa, ekipa Provedoria mos halo monitorizasaun ba programa implementasaun distribuisaun ai-moruk iha Timor-Leste, ne’ebé halo iha Munisipiu 4 mak hanesan Munisipiu Ainaro, Lautem, Viqueque, Dili no inklui RAEOA, ho razaun tanba atu minimiza área geográfika monitorizasaun ne’ebé luan no tempu ne’ebé naruk no bele iha posebilidade atu produs relatoriu tuir tempu determinadu.