Provedor Husu Ba Membru Asian NGO Coalition (ANGOC) For Agrarian Reform and Rural Development Atu Hamutuk Servisu Makas Liu Tan Hodi Luta Hasoru Konflitu ba Rai

Jakarta : Provedor de Direitos Humanos e Justiça apela ba membru husi nasaun sira ne’ebé maka hola parte iha Asian NGO Coalition (ANGOC) hanesan, Bangladesh, Cambodia, India, Indonesia, Nepal, Filipina nomos Timor-Leste atu hamutuk servisu makas liu tan hodi luta hasoru problema konflitu ba rai no defende direitu nain ba rai nian. Tanba konflitu rai hanesan mós problema ba direitus umanus.

Provedor de Direitos Humanos e Justiça, Sr. Virgílio da Silva Guterres “Lamukan” akompaña husi Chefe Gabinete PDHJ, Sr. Silvino Saldanha Pereira no Oficial Media, Sra. Joana da Cruz, partisipa iha rejional workshop on land conflict monitoring ne’ebé maka realiza husi ANGOC for agrarian reform and rural development, durante loron rua iha Meeting Room, Hotel Ibis Simatupang, Jakarta Selatan.

Rejional workshop ne’e nia objetivu atu aprezenta no diskute rezultadu no rekomendasaun husi relatóriu monitorizasaun konflitu rai, identifika área asaun prinsipál sira iha nivel rejionál atu rezolve konflitu rai no esplora parseria ho parte interesada sira seluk iha rejiaun Asia.

Iha abertura ba loron dahuluk husi workshop ne’e fasilita husi Chair Person Emeritus, ANGOC no aprejentasaun materia no diskusaun hamutuk entre membru ANGOC sira kona-ba relatoriu fiskalizasaun no monitorizasaun konflitu rai ne’ebé akontese iha tinan 2023, relasiona ho problema konflitu ba rai ne’ebé halakon direitu nain ba rai sira nian inklui kultura patriarkal ne’ebé maka halakon direitu ema feto sira nian iha sira nia rai rasik. Hanesan Indonesia, Filipina, Bangladesh, Nepal, India no Cambodia ne’ebé maka hola parte hanesan membru ANGOC.

Iha loron daruak workshop rejional ne’e Provedor hanesan Chair ba SEANF no Chair ba instituisaun direitus humanus iha Timor-Leste aprezenta reflesaun husi instituisaun direitus umanus nasionál/komisaun sira kona-ba relatóriu monitorizasaun konflitu rai. Iha intervensaun Provedor nian hateten, nasaun Timor-Leste mós iha problema ba rai liu-liu iha kultura patriarkal ne’ebé maka poder mane bo’ot liu kompara ho feto sira. Ne’ebé maka oan mane maka sai nain ba rai kompara ho oan feto sira. Alende ne’e konflitu rai hanesan mós problema ba direitus umanus.

Tanba ne’e, PDHJ aprende barak husi nasaun sira iha rejiaun Asia, ho ida ne’e agradese ba ANGOC ne’ebé maka konvida Provedor hanesan co-host ba organiza eventu ida ne’e.

Alende ne’e Provedor mós sai moderador ba iha diskusaun group iha plenaria relatóriu  rezultadu. Nune’e mós iha breves palavras Provedor nian iha enserramentu rejional workshop ne’e,  husu ba membru hotu ne’ebé maka hamahan an iha ANGOC atu luta makas hodi buka solusaun rejolve konflitu ba rai.

Partisipa iha Regional Workshop on Land Conflic Monitoring ne’ebe organiza husi Asian NGO Coalition for Agrarian Reform and Rural Development (ANGOC), Land Watch Asia no the Konsortium Pembaruan Agraria (KPA) parseria ho Komisaun Direitus Humanus Filipina (CHRP), co-host ho Provedoria dos Direitus Humanus e Justica (PDHJ) Timor-Leste.

Iha workshop refere hetan partisipasaun husi instituisaun direitus humanus hanesan  Bangladesh, Cambodia, India, Indonesia, Nepal, Filipina nomos Timor-Leste.