Gleno: Loron, 22 Abril 2024, Provedora de Direitos Humanos, Sra. Maria Marilia X. C. de O. da Costa, halo abertura ba formasaun kona-ba kna’ar FALINTIL-FDTL no direitos Humanos ba membru FALINTIL-FDTL husi Componente Terrestre Postu Destakadu Ermera hamutuk nain 25.
Iha diskursu ba formasaun ne’e Provedora Adjunta hateten, “FALINTIL-FDTL sira sai hanesan forsa ida ne’ebé estabelesidu husi Lei Inan no iha dever hodi respeita no proteje ema hotu nia direitus umanus ne’ebé konsagra iha Konstituisaun RDTL, lei nasional nomos lei Internasional sira ne’eb’e estadu Timor-Leste ratifika ona”.
Adjunta ba Direitus Umanus ne’e hatutan liu tan katak, iha sirkumtansia exesional ka situasaun espesial ruma hanesan krize ka estadu exesaun Konstitusional, FALINTIL-FDTL hala’o kna’ar besik liu komunidade no FALINTIL-FDTL iha papel propriu atu respeitu no proteje sidadaun sira nian direitus umanus wainhira halo atuasaun ruma hanesan kaer ka asegura suspeitu.
Tan ne’e atividade formasaun importante tebes atu Eleva ita bo’ot sira nia koñesimentu iha area direitus umanus, hatene regras no norma sira lei nasional no Internasional hodi respeita nafatin ba direitus umanus wainhira hala’o kna’ar tantu iha rai laran nomos rai seluk wainhira partisipa no kontribui ba misaun manutensaun da paz nasoins unidas iha mundu. Formasaun ida ne’e mós dalan ida hodi prevene violasaun ba komunidade iha territorial Timor-Leste.
Entretantu formasaun ba membru FALINTIL-FDTL sira, konsidera hanesan rezultadu ida husi kooperasaun entre PDHJ ho Komando FALITIL-FDTL ne’ebé estabelese iha tinan 2017 no renova iha tinan 2023. Formasaun direitus umanus ne’e nuudar atividades esensial ida husi areas atividade sira iha kooperasaun, ho intensaun atu hasaé membru sira nia kapasidade, kumpriensaun ba sira nia responsabilidade no klaridade kona-ba sira nia misaun.
Formasaun ne’e rasik kontinuasaun husi formasaun ne’ebé hala’o ona iha tinan 2018 too 2023 hamutuk dala 17, ho total partisipantes 426 kompostu husi feto 45 no mane 381 iha territorial Timor-Leste.
Iha fatin hanesan Segundu Komandante de Batalião Infanteria, Major Gergorio B. Correia, hateten formasaun ida ne’e sei la para iha ne’e no formasaun ne’e sei kontinua hodi nafatin fó koñesimentu ne’ebé diak liu entermus direitu no proteze direitu ba FALINTIL-FDTL rasik nomós ba sosiedade sira, tanba ne’e hakarak hatene no koñese diak liu entermus formasoins sira ne’e hodi nune’e bele aumenta liu tan servisu professional FALINTIL-FDTL sira nian
Nia hatutan, “Ami nia formasaun la’os iha ne’e de’it, maibé ami nia formasaun ne’e iha nia kontinuasaun ne’ebé sentru, formasaun husi ISNL ne’ebé mak agora iha metinaru, no mós fó formasaun liu-liu kona-ba Operasoes da Apoia Paz (OAP), oinsa koñese diak liu ONU nia servisu”.
Entretantu Formasaun ne’e rasik realiza iha Kampaun Komponente Terrestre Gleno, durante loron Lima hahu husi Loron, 22-26 Abril 2024, no fasilita husi treinador PDHJ, UADU, Ministeriu Defeza no FALINTIL-FDTL.