Provedora aprezenta RA 2020 Iha Plenaria PN
Dili : Provedora de Direitus Umanus no Justisa, Sra. Jesuina Maria Ferreira Gomes, MPA akompaña husi Provedor Adjunto ba área Governasaun Di’ak, Sr. Jose Telo Soares Cristovão, Provedora Adjunta ba área Direitus Umanus, Sra. Benícia Eriana Magno, Secretario Executivo, Sr. Ambrosio Graciano Soares, Xefi Gabinete Sr. Silvino Saldanha Pereira, no Kargu Diretores sira aprezenta relatoriu annual tinan 2020 ba membru Deputado sira iha plenaria Parlamento Nasional, Tersa-feira, 29/6/2021.
Iha aprezentasaun, S. E. Sra. Provedora esplika ba membru Deputado sira katak, konteúdu husi relatóriu anuál 2020 nia kompozisaun bazeia ba prioridades estratéjika haat (4) PDHJ nian, respetivamente: (1) Asegura autoridade públika iha kuñesimentu di’ak kona-ba direitus umanus no governasaun di’ak; (2) Garante autoridade sira bele halo prevensaun no koresaun ba violasaun ba prinsípius direitus umanus no governasaun di’ak; (3) Ema vulneravel sira iha protesaun hasoru abuzu direitus umanus no bele hetan asesu di’ak ba atendimentu Publiku ne’ebé di’ak no (4) Asegura PDHJ nia kapasidade no independénsia hodi garante implementasaun ba nia mandatu ho di’ak.
Provedora hatutan katak, husi prioridades estratéjika haat (4) ne’e konkretiza ba iha objetivu estratéjiku importante haat (4), nomeadamente: 1. Formasaun/treinamentu kona-ba direitus umanus no governasaun di’ak; 2. Simu kesar no investigasaun ba kazu sira kona-ba violasaun direitus umanus no prinsípius governasaun di’ak; 3. Fiskalizasaun no Rekomendasaun ba instituisoens públikas; 4. governasaun di’ak no jestaun institusionál. Objetivu estratéjiku sira ne’e hatuur iha atividades hamutuk sianulu-resin-neen (96) ne’ebé ezekuta tuir mandatu Provedor Direitus Umanus no Justisa nian.
Relatóriu Anuál tinan 2020 kona-ba atividades Provedor de Direitos Humanos e Justiça (PDHJ) nian ba Parlamentu Nasionál sai hanesan observánsia formál husi obrigasaun normativa ida ne’ebé hakerek iha artigus 34º no 46º husi Lei n.º 07/2004, altera ho Lei nº 8/2009, kona-ba Estatutu PDHJ katak: “To’o loron 30 fulan Juñu tinan-tinan, Provedor Direitus Umanus no Justisa sei submete ba Parlamentu Nasionál relatóriu ida detalladu kona-ba ninia atividade no inisiativa sira inklui estatístika kona-ba kazu no rezultadu sira ne’ebé hetan ona durante tinan ida nia laran, tuir kalendáriu sivíl, ne’ebé remata iha loron 31 fulan Dezembru”. Felizmente, nu’udar Provedora Direitus Umanus no Justisa hamutuk ho estrutura sira kumpre no aprezenta tuir tempu no regularmente ba Parlamentu Nasionál atividades no asaun sira hotu ne’ebé implementa ona durante tinan 2020 nia laran.