Provedora Interina Sra. Benícia Eriana Magno hato’o palestra iha Semináriu Nasionál ADTL

Dili – Iha loron 21 Novembru 2019, Provedora Interina atual Provedora Adjunta ba Direitus Umanus, Sra. Benícia Eriana Magno, hato’o palestra iha Semináriu Nasionál ho tema “Asesu ba Justisa no Proteje Direitus Sidadaun ho Defisiensia Tuir Lei Ne’ebé Vigor”. Semináriu ne’e organiza husi Associação de Deficientes de Timor-Leste (ADTL), iha salaun enkontru Ministério dos Transportes e Comunicações (MTC), Merkadu Lama, Dili.

Iha aprezentasaun ne’e, Provedora Interina hatutan kna’ar Provedoria dos Direitos Humanos e Justiça (PDHJ) nian iha ámbitu promosaun no protesaun ba direitus Ema ho Defisiensia (EhD), no asesu ba justisa no hatutan mós enkuadramentu legál, polítika no institutionál ne’ebé eziste iha rai laran.  

Maske nune’e, Provedora Interina hatutan katak, EhD iha Timor-Leste kontinua enfrenta bareira oi-oin ba asesu ba justisa, husi bareira ba fiziku em termus de asesibilidade (ez. falta de rampa ba defisiensia fizika, impressaun iha braille la disponivel ba defisiensia iha matan), bareira ba transporte (transporte ne’ebé la-adequadu difikulta abilidade EhD atu bele independente) no barreira de komunikasaun, ate a data Timor-Leste seidauk iha lingua jestual ofisial, no seidauk integradu iha serbisu públiku sira hotu inklui iha setor justisa.

PDHJ apresia esforsu Governu no Parlamentu Nasionál ne’ebé foti ona medida signifikante atu ratifika Konvensaun Internasionál ba Direitu Ema ho Defisiensia.