Komunikadu Imprensa BA DIVULGASAUN IMEDIATU
Provedoria dos Direitos Humanos e Justiça Lansa Relatóriu Levantamentu Persesaun Públika
Dili, 14 agostu 2024 – Provedoria de Direitos Humanos e Justiça (PDHJ) anunsia ho orgullu lansamentu relatóriu “Levantamentu Perspsaun Públika Kona-ba Provedoria de Direitos Humanos e Justiça” ne’ebé fornese análize kle’an kona-ba konxiénsia públiku, persesaun sira, no asesu ba servisu PDHJ nian. Levantamentu importante ida ne’e, ne’ebé hetan apoiu husi Programa Nasoins Unidas ba Dezenvolvimentu (PNUD) no servisu hamutuk ho Alumni Parlamentu Foinsa’e Timor-Leste (APFTL) refleta PDHJ nia kompromisu ba transparénsia, responsabilizasaun hodi promove no proteje direitus umanus no governasaun di’ak iha Timor-Leste.
Vizaun Jerál Levantamentu nian Hala’o iha munisípiu hotu-hotu no Rejiaun Administrativa Espesiál Oecusse Ambeno (RAEOA), levantamentu ne’e envolve partisipante 5,487 ho idade 20-59, inklui grupu demográfiku oioin hanesan mane, feto, indivíduu LGBTIQ+, no ema ho defisiénsia. Estudu ne’e ho objetivu atu sukat konxiénsia públiku nian kona-ba PDHJ, avalia komprensaun kona-ba ninia papél, no identifika bareira sira atu asesu ba ninia servisu sira.
Deskobrimentu Xave Sira Konxiénsia no Komprensaun: Survey revela katak enkuantu 33.1% hosi respondente sira hatene kona-ba PDHJ, 26.1% de’it maka komprende ninia papél iha promosaun no protesaun direitus umanus, no 22.6% rekoñese ninia papél iha promosaun governasaun di’ak.
- Disparidade Rejionál sira: Konsiansia kona-ba PDHJ notavelmente aas liu iha Dili ho 50.5%, kompara ho nível ki’ik liu iha munisípiu sira seluk, partikularmente iha rejiaun Ponta Leste.
- Dezafiu Asesu: Liu 80% hosi respondente sira hetan difikuldade atu asesu ba servisu PDHJ, liuliu tanba falta koñesimentu kona-ba prosedimentu asesu no barreira jeográfika sira.
- Sentimentu Públiku: Iha insatisfasaun notável no falta konfiansa iha PDHJ nia abilidade atu rezolve keixa ho efetivu, ho preokupasaun kona-ba resposta ne’ebé la adekuadu no kestaun sira ne’ebé seidauk rezolve.
Introdusaun no Rasionalidade Estabelese tuir Artigu 27 Konstituisaun RDTL no Lei No. 7/2004 (altera ho Lei No. 8/2009), PDHJ iha knaar atu salvaguarda sidadaun sira-nia direitu no garante governasaun di’ak. Enkuantu PDHJ selebra nia aniversáriu ba dala 20 iha 2024, levantamentu ida-ne’e marka pasu krusiál ida hodi reflete kona-ba nia realizasaun sira no identifika área sira atu hadi’a.
Deskobrimentu levantamentu nian sei orienta PDHJ atu hadi’a ninia servisu sira, hasa’e konfiansa públiku, no reforsa ninia papél hodi haburas direitus umanus no governasaun di’ak.
Metodolojia Levantamentu ne’e uza métodu amostrajen konveniénsia la’ós probabilidade nian (non-probability sampling), ho dadus ne’ebé halibur hosi espasu públiku oioin. Esforsu sira halo ona atu minimiza prejuizu no asegura amostra reprezentativu ida, ho atensaun ba limitasaun balu, hanesan barreira edukasionál no lian nian.
Étika no Limitasaun sira Partisipante sira hetan informasaun kona-ba objetivu estudu nian, no sira nia privasidade no konfidensialidade mantein ho rigorozu. Levantamentu ne’e hasoru dezafiu sira, inklui limitasaun tempu halo aproximasaun ho autoridade munisipál sira no kestaun asesibilidade ba grupu komunidade balun. Levantamentu sira iha futuru sei haree ba limitasaun sira-ne’e hodi asegura kolesaun dadus ne’ebé komprensivu liu.
Apoiu no Agradesimentu sira Levantamentu ida-ne’e sai posivel liuhosi apoiu finanseiru no kolaborasaun husi PNUD, APFTL, no pesoál PDHJ ne’ebé dedikadu. Sira nia kontribuisaun sira sai instrumentál hodi avansa objetivu sira peskiza ida-ne’e nian.
Ba Futuru PDHJ komprometidu atu aproveita informasaun hirak ne’e hodi hasa’e nia servisu no serve di’ak liután públik. Relatóriu levantamentu nu’udar instrumentu ida ne’ebé iha valór atu kompriende persesaun públiku no sei informa estratéjia sira iha futuru hodi garante PDHJ mantein efetivu iha nia misaun sira.
Ba asuntu mídia kontaktu: Joana da Cruz +670 78566745 Antoninho Bernardino +670 77709837 E: media@pdhj.tl Website : www.pdhj.tl Facebook, Instagram, LInkedIn: PDHJ Timor-Leste
Konaba PDHJ Provedor de Direitos Humanos e Justiça (PDHJ) nu’udar órgaun independente ne’ebé harii atu promove no proteje direitus umanus no garante governasaun di’ak iha Timor-Leste. Ho mandatu atu hatán ba keixa sira, investiga alegasaun sira, no halo advokasia ba justisa, PDHJ dezempeña papél krítiku hodi tane aas sidadaun Timoroan sira-nia direitu no liberdade.
REMATA
This post is also available in: English