• Sai jestor tenke iha responsabilidade legal no étika

    Dili : Provedora, Jesuina Maria Ferreira Gomes, MPA iha nia diskursu serimónia tomada de posse ba kargu Diretora Investigasaun no Xefi Unidade Assistênsia Jurídiku Administrativa no Peskiza (UAJAP) husu ba empozados sira atu asumi responsabilidade hanesan jestor no lider.

    “Tanba jestor sira iha responsabilidade legal (haktuir leis, regulamentus, prosedimentus) no responsabilidade étika: Haketak propriedade rasik no propriedade eskritóriu, Impersonal: relasaun servisu formal haktuir regras, hases-an husi asuntu sentimentu, Kontabilidade, Responsivu: kapasidade hatán lalais, la adia tempu/hanaruk atendimentu. Implementasaun Étika iha burokrasia hatudu iha Kódigu Étika Funsaun Públika Lei 8/2004 Artigo 45.

    Jestor nia papel mos atu halo planu, organiza, koordena, implementa no halo monitorizasaun no relatóriu servisu nian; supervizar no organizar servisu no funsionáriu sira, halao prosedimentu administrativu ne’ebé eficiente, hadia metodu no dezempeñu servisu, avalia funsionáriu nia atitude, no realiza ka transforma polítika ba asaun.

    Nu’udar líder iha funsaun atu fo orientasaun no motivasaun ba sub ordinadu sira atu servisu ho efikas no efisiente, Kria ambiente servisu nebe’e diak no harmonia, no sai exemplou ba sub ordinadu sira laos deit fo exemplo.

    Provedora esplika katak, tuir Dekretu Lei Númiru 31/2016, Organika PDHJ, alterasaun husi Dekretu Lei Númiru 25/2011, PDHJ nia estrutura iha kargu diresaun no chefia hamutuk 17 mak hanesan Sekretariu Ezekutivu, Inspetor, Chefe Gabinete, Diresaun no Unidade 6 no iha Delegasaun Territorial 4 no Departamentos 3.

    Estrutura Diresaun no chefia 15 mak prenxido ona bazeia ba rezultadu selesaun por merito iha 2016. Durante ne’e iha pozisaun kargu Diretur 2 mak sei ho nomeasaun en substituisaun. Ho seremonia tomada de posse ohin ne’e kompleta ona estrutura PDHJ tuir Dekretu Lei Númiru 31/2016 liu husi prosesu selesaun pur méritu.

    Iha oportunidade ida ne’e, Provedora, agradese ba Prezidente Komisaun Funsaun Publika (KFP) ne’ebé sempre disponivel hodi autoriza reprezentante husi KFP hodi sai membro júri ba selesaun por merito ba kargu Diretur Investigasaun no Xefi Unidade Assistênsia Jurídiku Administrativa no Peskiza.

    Biban ne’e mos, hato’o apresiasaun no agradesimentu ba disponiblidade no kontribuisaun husi Reitor UNTL, Diretur Ezekutivu JSPM, Prezidente Board Rede Feto, Inspetora PGR ne’ebe sai ekipa júri ba selesaun Provedor Adjuntos ne’ebé simu ona tomada de posse iha Parlamentu Nasional iha fulan Fevereiru 2019.

    Ikus lius agradese ba media sira ne’ebé sempre halo publikasaun ba atividades PDHJ nian. Media iha papel importante tebes atu hatutan informasaun ba públiku.