Segundu Enkontru Grupu Traballu Tekniku SEANF

Thailandia : Loron, 19 – 21 Jullu 2023, Provedor-Adjunto ba asuntu Boa Governasaun, Sr. Rigoberto Monteiro, akompanha husi Sra. Elsa do Rosario Viegas da Costa, Diretora Asistensia Publika no Sra. Olga Vilanova Sequeira Teknika Espesializada Relasaun Publika no Koordenasaun Institutional, partisipa iha 2nd Technical Working Group (TWG) Meeting, South East Asia National Human Rights Forum (SEANF) iha Bangkok, Thailand. Enkontru ne’e partisipa husi membru instituisaun nasional direitus humanus   SEANF ne’ebé kompostu husi Komnas HAM (Indonesia), SUHAKAM (Malazia), CHRP (Filipina), MNHRC (Myanmar), NHRCT (Thailand) no PDHJ (Timor-Leste),

Objetivu husi TWG ne’e atu atualiza progresu serbisu husi nasaun membru sira kona-ba dezenvolvimentu instituisaun no atividade boot sira husi fulan Janeiru – Junho 2023 no mós prepara agenda tentativa no atividade ba konferensia annual SEANF nian ne’ebé tuir planu sei hala’o iha loron,  22-24 Novembru 2023 iha Bangkok. Alende halo mós diskusaun kona-ba prioridade, no estatutu SEANF nian nune’e bele aprezenta ba konferensia annual SEANF nian.

Relasiona ho asuntu sira ne’e Provedor-Adjunto ba asuntu Boa Governasaun, hatoo dezenvolvimentu instituisaun no obstakulu sira iha fulan 6 nia laran, inklui servisu promosaun no edukasaun, servisu fiskalizasaun no rekomendasaun, asistensia publika, investigasaun, kooperasaun PDHJ ho nasional no internasional.  Provedor-Adjunto mós fo intervensaun ba diskusaun teknika kona-ba prioridade SEANF nian ne’ebé aprezenta husi SUHAKAM.

Entretantu iha enkontru ne’e mos SEANF konvida reprezentante sira husi grupu parseiru sira hanesan World Justice Project (WJP) ho FORUM-ASIA/ANNI, kona-ba sira nia rezultadu serbisu no peskiza iha relasaun ho promosaun Direitu Humano iha rejiaun Sudeste Aziatiku.