• Sekretariu Ezekutivu PDHJ Halo Abertura Iha Atividade Disseminasaun papel PDHJ liga ho direitus umanus no governasaun di’ak Ba Komunidade Wenunu

    Dili: Sekretariu Ezekutivu, Sr. Ambrosio Graciano Soares, iha loron,22 Março 2024, halo abertura no lori mós materia papel PDHJ liga ho direitus umanus no governasaun di’ak iha atividade disseminasaun ba autoridade lokal no komunidade, iha Suku Wenunu postu administrativu, Metinaru, Munisipiu Dili.
    Objetivu husi disseminasaun ne’e atu aumenta koñesementu autoridade lokal no komunidade sira nian kona-ba papel Provedor de Direitos Humanos e Justiça inklui proteje direitus umanus no governasaun di’ak.
    Tanba PDHJ nudár instituisaun nasionál direitus umanus Timor-Leste nian, orgaun independente ne’ebé hari’i atu proteje direitus umanus no promove governasaun di’ak sei alkansa nia objetivu liu husi, edukasaun, promove kooperasaun, rezolusaun, no investigasaun, peskiza no monitorizasaun.
    Ne’eduni disseminasaun ida ne’e hanesan parte ida husi edukasaun ne’ebé maka atu konsiensializa públiku liu husi promosaun hodi respeita ba direitus umanus, estadu de direitu no governasaun di’ak.
    Alende materia husi Sekretariu Ezekutivu iha mós materia husi Formandu PDHJ ne’ebé maka lori mós materia kona-ba direitus umanus no governasaun di’ak ba komunidade sira.
    Entretantu disseminasaun ne’e rasik hala’o iha loron sorin no hetan partisipasaun masimu husi Komunidade, autoridade lokal, OPS, sira husi suku Wenunu nian.