Sosializasaun Knár PDHJ Ba Estudantes Ensinu Secundariu Cristal
Dili : Provedoria dos Direitos Humanos e Justiça (PDHJ) liu husi Diresaun Nasional Promosaun realiza atividade sosializasaun kona-ba “Papel PDHJ, Prinsipiu Baziku Direitus Umanus, Trafiku Umanu no Direitu Labarik ba estudantes Finalistas 30 Ano Ensinu Sekundariu Cristal, iha salaun Fundasaun Cristal Balide-Dili, Tersa-Feira, 17/10.
Reprezentante Provedor atual Xefi Gabinete Provedor, Silvino Saldanha Pereira iha abertura hateten, objetivu husi atividade ne’e atu habelar informasaun kona-ba papel provedoria nian, prinsipiu direitus umanus, trafiku umanu ba estudantes sira, atu nune’e bele iha koñesimentu ba servisu Provedoria nian.
Xefi Gabinete hatutan, knár importante ida PDHJ nian liu husi Diresaun Nasional Promosaun mak habelar informasaun ba komunidades sira inklui mos estudantes sira atu nune’e sira bele hatene sira nia diretu no dever núdar estudante hodi ezerse sira nia direitu no kumpri sira nia dever hanesan estudantes. Núdar estadante sira iha direitu atu asesu ba kualidade edukasaun maibé estudantes mos iha dever atu estuda no kumpri regras sira husi eskola nian.
Iha fatin hanesan, Fundador Fundasaun Cristal, Dr. Agustinho dos Santos Gonçalves, SE. MM hateten mos katak, meius sosializasaun ne’e importante tebes tanba bele hasa’e koñesimentu estudantes sira nian liga ba servisu Provedoria nian liu-liu atu nune’e sira bele hatene sira nia direitu no dever hanesan sidadaun.