Jakarta, Indonézia – 5 Novembru 2024 – Diálogu Direitus Umanus ASEAN nian ba dala VI hala’o iha Sede ASEAN nian iha Jakarta, halibur reprezentante sira hosi Estadu-membru ASEAN nian (AMS), Komisaun Intergovernamentál ASEAN nian kona-ba Direitus Umanus (AICHR), no parte interesada prinsipál sira hanesan Instituisaun Nasionál Direitus Umanus (NHRIs) no organizasaun sosiedade sivíl (OSS). Diálogu importante ida-ne’e, parte ida hosi AICHR nia programa prioridade 2024, ho objetivu atu promove direitus umanus, hametin kooperasaun rejionál, no fahe prátika di’ak liu entre AMS.
Diálogu tinan ida-ne’e nian harii iha inisiativa sira uluk nian ne’ebé hala’o iha 2013, 2014, 2021, 2022, no 2023, no aliña ho AICHR nia Planu Serbisu ba Tinan Lima (2021-2025), partikularmente foka ba kompromisu ASEAN nian ba promosaun no protesaun direitus umanus. Eventu ne’e kontinua ba Deklarasaun Líder sira ASEAN nian kona-ba Diálogu Direitus Umanus ASEAN nian, ne’ebé subliña papél AICHR nian hodi fasilita fórum kooperativu sira hodi rezolve dezafiu sira direitus umanus nian iha rejiaun ne’e.
Tema no Sesaun Xave sira
Sesaun abertura konta ho lia menon husi Reprezentante AICHR Indonézia nian, Wahyuningrum, no Reprezentante Lao PDR nian, Yong Chantalangsy. Ministru Negósiu Estranjeiru Indonézia, Harta Sugiono, hato’o diskursu prinsipál. Objetivu prinsipál diálogu nian maka atu kria espasu ida ba nasaun sira ASEAN nian hodi diskute no fahe progresu sira kona-ba direitus umanus, dezafiu sira, no prátika di’ak sira, ho hanoin atu haburas solidariedade no kooperasaun rejionál.
Durante sesaun dahuluk, Estadu-membru sira ASEAN halo aprezentasaun kona-ba promosaun no protesaun ba direitus umanus, ne’ebé kobre tópiku oioin, inklui enkuadramentu nasionál sira direitus umanus nian, kumprimentu legál, no kooperasaun ho mekanizmu direitus umanus internasionál sira. Hafoin ida ne’e kontinua ho diálogu interativu sira, iha-ne’ebé partisipante sira iha oportunidade hodi envolve iha diskusaun nakloke sira kona-ba oinsá atu hasoru dezafiu komún sira hanesan violasaun direitus umanus, igualdade jéneru, no direitu sira hosi grupu marjinalizadu sira.
Timor-Leste Nia Kontribuisaun
Iha Sesaun #2, Provedóra-Adjunta ba Direitus Umanus, Maria Marilia da Costa, aprezenta Timor-Leste nia kontribuisaun no esperiénsia sira iha promosaun no protesaun ba direitus umanus. Nu’udar membru observadór ASEAN nian, Timor-Leste halo progresu signifikativu hodi harii sistema demokrátiku iha ne’ebé direitus umanus sai sentrál ba dezenvolvimentu nasionál. Instituisaun Nasionál Direitus Umanus nasaun nian, Provedór Direitus Umanus no Justisa (PDHJ), hala’o papél krusiál ida hodi monitoriza situasaun direitus umanus, hala’o edukasaun públika, no halo advokasia ba governasaun di’ak.
“Timor-Leste nia kompromisu ba direitus umanus mai husi ita-nia esperiénsia istóriku rasik no ita-nia aspirasaun ba sosiedade ida ne’ebé pasífiku, justu, no inkluzivu,” dehan Provedóra-Adjunta Maria Marilia da Costa. “Nu’udar membru observadór ASEAN nian, Timor-Leste dedikadu atu haburas diálogu no kolaborasaun entre Estadu-membru ASEAN sira hodi promove no proteje direitus umanus iha rejiaun tomak.”
Sesaun ne’e hetan resposta di’ak, ho delegadu sira nota importánsia hosi kolaborasaun entre AMS hodi rezolve kestaun sira direitus umanus nian ne’ebé mosu hanesan diskriminasaun, laiha estadu, no direitu sira hosi grupu vulneravel sira.
Hamutuk ho Provedór-Adjuntu partisipa iha eventu ne’e profisionál superiór sira husi PDHJ, inklui Aureo José Antonio Savio, Profisionál Superiór ba Boa Governasaun, no Florindo José da Costa, Inspetór Jerál husi Ministériu Justisa.
Rezultadu Xave sira no Diresaun sira ba Futuru
Diálogu Direitus Umanus ASEAN nian ba dala VI konklui ho adosaun ba Deklarasaun Konjunta no rekomendasaun sira hodi orienta asaun sira iha futuru no hasa’e kooperasaun entre Estadu-membru sira ASEAN nian (AMS). Eventu ne’e inklui briefing estadu nian, diálogu interativu sira, no kontribuisaun sira hosi parte interesada sira hosi Instituisaun Nasionál sira Direitus Umanus nian (NHRIs), Organizasaun sira Sosiedade Sivíl nian (OSS), no Reprezentante Permanente sira ASEAN nian.
Aliña ho AICHR nia mandatu sira, Diálogu ne’e subliña importánsia atu enkoraja AMS atu ratifika no implementa tratadu direitus umanus internasionál sira, hametin relatóriu nasionál no mekanizmu akompañamentu, no rezolve kestaun transversál sira hanesan igualdade jéneru no protesaun ba grupu vulneravel sira.
Ba oin, AICHR sei kontinua hala’o papél xave ida hodi forma ajenda direitus umanus ASEAN nian, hodi garante katak rejiaun ne’e iha nafatin kompromisu atu avansa protesaun no promosaun direitus umanus ba ema hotu.
Eventu ida-ne’e kontribui liután ba ASEAN nia esforsu sira ne’ebé la’o daudaun atu harii Komunidade ASEAN ida ne’ebé sentradu ba ema, orientadu ba ema, iha ne’ebé direitus umanus hetan respeitu, protesaun, no tane aas iha rejiaun tomak.
Ba informasaun liután favor vizita komunikadu imprensa iha website AICHR: https://aichr.org/news/press-release-6th-asean-human-rights-dialogue/
This post is also available in: English