• Ba Website 1

    PDHJ Realiza Enkontru Públiku Ho Funsionariu Saúde Munisipiu Ainaro

    Ainaro – iha loron 8 fulan Marsu 2016, Provedoria Direitus Umanus no Justisa (PDHJ) Diresaun Boa Governasuan Departamentu Prevensaun no Monitorizasaun realiza enkontru públiku ho funsionariu Ministério Saúde Munisipiu Ainaro kona-ba Sistema Distribuisuan Ai-moruk Iha Timor-Leste.

    Adjuntu Provedor ba area Direitus Umnanus, Dr. Horacio de Almeida iha abertura hateten ba partisipantes sira katak, objetivu husi sesaun enkontru públiku ne’e hanesan parte ida atu rekolha tan pontus-pontus informasaun adisional balun ne’ebé mak PDHJ seidauk konsege rekolha hotu.

    Provedor Adjuntu husu ba partisipantes sira atu fo sira nia opiniaun no komentariu kona-ba dadus distribuisaun ai-moruk mak PDHJ halibur ona, karik sei falta informasaun ruma mak seidauk kompleta husu informasaun adisional hodi kompleta relatoriu final ne’ebe sei esbosu. No mos husu ba partisipantes sira atu fo sira ninia sujestoens kona-ba rezultadu analiza, konkluzaun no rekomendasaun maka PDHJ dezenvolve ona liu husi materia aprezentasaun rezultadu peskiza ninian.

    Iha sesaun ba aprezentasaun rezultadu peskiza “Sistema Distribuisaun Ai-moruk Iha Timor Leste”, partisipantes sira antusiazmu no apresia ho rezultadu peskiza PDHJ nian ne’e, hanesan meius importante ida atu bele fasilita liu tan sira nia prestasaun servisu iha parte atendimentu publiku. Aliende ne’e, partisipantes sira hato’o sira nia informasaun, komentariu, opiniaun no sujestaun adisional sira ligadu ho rezultadu peskiza husi PDHJ nian ne’ebé aprezenta ona.

    Entretantu iha seremonia enseramentu ba enkontru ne’e, Provedor Adjunto hato’o agradesimentu ba partisipantes sira ne’ebé fó sira nia informasaun adisional. Nomos Provedor Adjuntu hameno hela ba sira katak sira nia informasaun hotu sei halo reanalize hodi bele reforsa liu tan iha parte rekomendasaun mak PDHJ dezemvolve ona iha relatoriu monitorizasaun ninian, antes atu publika no/ka emenda ba ministeriu kompetente atu bele hola responsabilidade para hadiak.

    Atividade enkontru públiku ne’e, realiza iha servisu fatin Saúde Munisipiu Ainaro, ne’ebé hetan partisipansaun husi Adjunto Servisu Saude Munisipiu Ainaro ho ninia strututa servisu Saude Munisipiu sira hanesan Chefe Sentru Saude Infermária Ainaro Vila, Chefe Sentru Saude Komunitaria Hatu-Udo, Maubisse, Hatobuilico, Chefe Postu Saude/HP Cassa, Foho Ailico no Hautio, Medikus Jerais, Enfermeiru/a, Farmasistas no parteiras.

Comments are closed.