• fp no labarik involve iha kampaña elpar

    Date : 20-06-2012

    Covalima –Kampaña partido Fretilin iha Kampo Ladi, Suco Kamanasa Distrito Covalima, ekipa monitorizasaun husi Provedoria dos Direitos Humanos e Justiça (PDHJ) identifika katak Funsionario Publiku (FP) husi Ministerio da Edukasaun (ME) liu husi profesores balun husi eskola sekundario Seran Kotek no mos  labarik barak mak involve iha  aktividade kampaña.

    Tuir observasaun husi ekipa monitorizasaun iha Distrito Covalima katak, partido Fretilin hahu kampaña komesa ho mobiliza militantes no simpatijantes iha oras tuku 10. 00 dader hodi hein Sekretario Jeral Partido  Fretilin Dr. Marii Alkatiri atu hato’o komprimisiu politika  ba militantes no simpatijantes inklui mos ba halo vizita ba edifisiu hospital referal Dsitrito Covalima.

    Kampaña ne’e hetan partisipasaun ho livre husi komunidades no labarik sira hodi rona komprimisiu politika ne’ebe hoto’o husi Sekretario Jeral Partido  Fretilin Dr. Marii Alkatiri.

    Iha kampaña ne’e mos hetan presensa masimu husi estudantes medicina ne’ebe halao hela sira nia estazio iha hospital referal Covalima maibe estudantes hirak ne’e hetan subsidiu kada fulan husi Governo liu husi Ministerio Saude.

    Iha prosesu kampaña ne’e, estudantes medicina nain tolu mak hanesan mane nain rua no feto ida mos koalia hodi hato’o mos programa husi partido Fretilin maibe diskursu ne’ebe hato’o husi estudantes medicina sira ne’e, iha mos lia fuan insulta malu ne’ebe sira refere ba partido seluk hanesan partido CNRT no partido PD no temi mos parte igreja.

    Tamba komunidade la satisfeito ho lia fuan ne’ebe sira hato’o, depois de kampanha konsege mosu barulhu ka asaun fisiku entre joven balun ho mane ida ho naran inisial ec husi estudante medicina nian, maibe husi parte seguransa liu husi PNTL hola kedas medidas hodi hakalma situasaun refere.

    Konaba Funsionariu Publiku no presensa husi estudante medicina iha aktividade kampaña partido Fretilin, Adjuntu Provedor ba area direitus humanus, Dr. Silveiro Pinto Baptista hateten katak, tuir estatutu labele involve iha pratika politika durante aktividades kampaña eleisaun parlamentar, razaun katak sira (estudantes medicina Red) hanesan ema profisional da saude nian tamba ne’e servisu tenki independente.

    “Maske oras ne’e dadaun sei sai hanesan estudante ne’ebe sei halao estajio maibe iha loron ida sira sei sai hanesan funsionario publiku, hanesan realidade agora dadaun sira simu ona subsidio husi governo liu husi Ministerio Sauda,”Esplika Adjuntu Provedor”

    Entretantu Adjunto Provedor husu mos ba  funsionario publiku atu servisu ho independente no responsabilidade tamba funsionariu publiku hanesan servidor do povu no hanesan mos makina estadu, sekarik atu involve iha politika partidaria  tenki tuir regras ne’ebe Comisaun Funsaun Públika (CFP) determina ona.

    “Sei bainhira funsionario publiku mak involve iha aktividades kampaña la iha deklarasaun ba CFP mak konsidera hanesan mal administrasaun no korupsaun ba tempu servisu nian,”sujere Adjunto Provedor.

    Iha  loron hanesan partido PDN hala’o ninia programa kampaña iha Suco Belekasak,  Sub-Distrito Maukata, ekipa monitorizasaun PDHJ mos identifika katak iha prezensa husi profesores sira maibe la bele atu identifika naran no fatin eskola sira hanorin ba tamba la iha  koperasaun ho ekipa monitorizasaun.

    Durante prosesu kampanha ho modelo dialogo ne’e la hetan seguransa husi PNTL sira no la iha mos observasaun husi parte CNE.

    Wainhira ekipa monitorizasaun halo konfirmasaun ho  komandante esquarda PNTL Sub-Distrito Maukatar, Mario Barros hateten katak tuir ajenda husi sira nia partido atu realiza aktividade kampaña iha fatin ne’e, maibe partido ne’e liu husi ninia reprezentante iha distrito la fo koñsimentu ba parte  PNTL.

    Ho kestaun ne’e, Adjuntu Provedor ba area direitus humanus Dr. Silveiro Pinto Baptista husu  ba lideransa partido politiku sira tomak hodi kopera ba malu ho autoridades Distrito no autoridades Lokal sira tomak iha territoria laran, liu-liu  parte seguransa, atu nune’e la bele mosu instabilidade durante hala’o kampaña.

     

    Presiza Informasaun bele kontakto, Jose Tefa ho numeru telephone; +670 735 1412 0u +670 333 1071 (Relasaun Publiku PDHJ)

Comments are closed.