• pn-stae iha poder altera lei eleitoral

    Date:  21-03-2012

    Dili- Parlamento Nasional (PN) no Sekretariadu Tekniku Administrasaun Eleitoral (STAE)  iha poder atu halo alterasaun ba lei eleitoral ne’ebe prejudika komunidade inklui estudante sira iha primeira vota eleisaun Prezidensial.

    “PN ho STAE tenki altera lei ne’e, para iha eleisaun mai, estudante  sira labele halai tun sae, tamba deit hakarak vota,” Provedor Interino Dr. Pereira dos Santos fo sai kestaun ne’e ba jornalista liu husi konferensia imprensa iha edifisiu PDHJ – Caicoli Dili,21/3.

    Provedor Interino hatutan, primeira eleisaun liu ba ema barak la bele hola parte iha festa demokrasia ne’e, tanba la iha posibilidade atu ba vota iha sira nia Distrito.

    Provedor Interino ne’e husu ba STAE atu kria sistema votasaun ne’ebe posibelmente ba sidadaun hotu-hotu atu bele partisipa, la bele halo ida hodi impede direitu povu atu hili sira nia lideransa liu husi eleisaun.

    Iha fatin hanesan, Adjuntu Provedor ba area Direitus Humanus, Dr. Silverio Pinto Baptista hateten, lei eleitoral ne’e halo atu la bele fo espasu ba ema nain ida vota dala barak, katak vota uluk ba hamos tiha tinta ba vota tan, maibe lei ne’e la fo vantajen ba sidadaun hotu atu hola parte iha eleisaun, enkuantu sira hela dook husi sira nia Distrito.

     

    Husi Jornal STL, 22/3/2012, Pag ; Eleisaun Prezidensial, nes.

     

     

    PDHJ Identifika FP Nain 14 Involve Iha Kampaña Prezidensial

    Dili –Monitorizasaun provizoriu husi ekipa Provedoria  Direitos Humanos no Justisa (PDHJ) identifika Funsionario Publiku (FP) hamutuk nain 14 mak involve iha periodu kampaña Prezidensial tinan 2012-2017.

    Dadus provozoriu konaba involvimentu  Funsionario Publiku iha prosesu kampaña Prezidensial mak hanesan ba kandidatura  Jose Luis Guteres “LUGU” hamutuk nain 8 mak involve.

    Iha ekipa susesu kandidatura Tau Matan Ruak, PDHJ la iha númeru klaru, maibe identifika membru Parlamento Nasional ne’ebe durante kampaña ba kandidatura Taur nian uza kareta Parlamento nian ho marka 88 MP.

    Ba kandidatura Fernando de Aroujo Lasama, Funsionario hamutuk nain 6 mak involve. Iha Distrito Manufahi, tuir rezultadu provizoriu PDHJ nian hatudu katak, Funsionariu Publiku uza viatura Estadu hanesan kareta ho xapa G  no motorizada hamutuk 10 resik.

    “Ne’e rezultadu provozoriu husi ami nia monitorizasaun durante periodu kampaña Prezidensial. Ami seidauk bele temi funsionariu sira nia naran tamba sei presiza konfirma lai ho Comissão Função Público (CFP) mak  foin bele fo sai ba publiku hodi hatene”, Hateten Provedor Interino Dr. Rui Pereira dos Santos iha konferensia imprensa iha edifisiu PDHJ Caicoli-Dili, 21/3/2012.

    Provedor Interino hatutan, oras ne’e dadauk parte PDHJ sei hein ekipa monitorizasaun husi  Distrito 13  kompletu  mak foin rekomenda ba  orgaun kompetente sira inklui Comissão Função Público (CFP)  hodi foti medidas hasoru funsionariu sira ne’ebe involve iha prosesu kampaña Prezidensial  la husu licensa.

    “Dadus hirak ne’e, ami (PDHJ Red) sei konfirma ho Comissão Função Público (CFP) katak funsionariu ida ne’e husu licensa ka lae. Se nia  husu duni licensa nia sorte maibe kuandu la husu licensa ami se rekomenda ba CFP hodi foti medidas”, hateten Rui.

    Iha fatin hanesan, Adjunto Provedor ba area Direitus Humanus, Dr. Silverio Pinto Baptista hateten, ekipa PDHJ ne’ebe halo monitorizasaun ba kampaña Prezidensial no eleisaun kompostu husi grupo rua (2) hanesan ida hare konaba asuntu direitus humanus no ekipa ida hare konaba asuntu Boa Governasaun.

    Konaba direitus humanus, Silverio hateten, iha tempu kampaña ekipa susesu balun ba halo ameasa, intimidasaun no presaun ba komunidade ne’ebe mak hela iha ar ea izoladu katak se wainhira komunidade sira ne’e la vota ba iha sira nia kandidatura maka aban bain rua sira sei la hetan ajuda hudi governo.

    Silverio reforsa katak, husi kazu hirak ne’e, PDHJ sei rekomenda ba orgaun kompetente no CFP hodi foti medidas ba kestaun  ne’e, atu nune’e la bele akontese tan iha future mai.

     

    Husi Jornal Nasional Diario, 23/3/2012, Pag ; Jeral-Hal 12, may/mj-1

Comments are closed.