provedor tuir enkontru anual apf iha indonesia
Date, 02-08-2010
Provedor de Direitos Humanos e Justiça (PDHJ) Dr. Sebastião Dias Ximenes no adjuntu Provedor ba area direitos humanos inklui director ba direcção Nasionál direitos humanos sei partisipa enkontru anuál Asia Pacific of National Human Rights Institution (APF) ba dala 15 iha Bali-Indonesia.
Enkontru anuál Asia Pacific Forum husi Instituisaun Nasionál ba Direitos Humanos ne’ebé hahú husi loron 3 to’o 5 Agostu 2010 ne’e partisipa husi instituisaun ba direitos humanos ne’ebé sai membru permanente APF. Sai uma nain ba enkontru ne’e mak Komisaun Direitos Humanos Indonesia.
“Topiku iha enkontru ne’e kona-ba direitos humanos en jerál. Topiku espesífiku mak kona-ba orientasaun sexual identidade jéneru (Sexual orientation and gender Identity) prinsípiu Paris, prosesu akreditasaun ba International Coordinating Committee (ICC) no issu relevantes seluk hanesan funsaun instituisaun Nasional Direitos Humanos nasaun ida-idak nian” hateten Dr. Sebastião Dias Ximenes, Provedor.
Delegasaun husi PDHJ ne’ebé partisipa iha enkontru anuál ne’e mak hanesan Dr. Sebastião Dias Ximenes Provedor, Dr. Silverio Pinto Baptista, adjuntu Provedor ba area direitos humanos no Valerio Magno Ximenes, director nasionál Direitos Humanos.
“Iha enkontru ne’e mós membru APF sira husi nasaun ida-idak aprezenta sira nia relatóriu kona-ba atividade ne’ebé sira hala’o ona durante tinan ida nia laran” hatutan Provedor.
Iha tinan tolu liu ba PDHJ sai ona full member ba APF liu husi enkontru anuál ba dala 12 Asia Pacific Forum Instituisaun Nasionál ba Direitos Humanos ne’ebé momentu ne’ebá hala’o iha Sydney Australia.
“Enkontru ne’e importante tanba membru sira bele fahe esperensia kona-ba atividade no dezafiu sira ne’ebé instituisaun Direitos Humanos sira hasoru. Nune’e mós instituisaun foun Direitos Humanos ne’ebé foin harii hanesan PDHJ bele troka esperensia ho instituisaun seluk ne’ebé harii kleur ona no iha esperensia barak” hateten Provedor.
Presiza informasaun kontaktu
Lady Ximenes, Informasaun & Relasaun Públika PDHJ
HP, 7304260 ou 333 10701